غزہ میں تازہ اسرائیلی حملوں میں 21 افراد ہلاک، متعدد زخمی

غزہ (ڈیلی اردو/اے پی/اے ایف پی/روئٹرز)  حماس کے طبی حکام نے بتایا ہے کہ غزہ پٹی کے مختلف علاقوں پر کیے گئے تازہ اسرائیلی فضائی حملوں میں کم از کم 21 افراد ہلاک جبکہ متعدد زخمی ہو گئے۔

غزہ میں مقامی طبی حکام نے بتایا ہے کہ  غزہ پٹی کے مختلف علاقوں پر کیے گئے تازہ اسرائیلی فضائی حملوں میں کم از کم 21 افراد  ہلاک جبکہ متعدد زخمی ہو گئے۔ اسرائیلی فوج کے مطابق یہ کارروائی  جنگ بندی ڈیل کی خلاف ورزی کے نتیجے میں کی گئی۔

 یہ پیش رفت فلسطینی عسکری گروپ حماس اور اسرائیل کے درمیان نازک جنگ بندی کے لیے ایک نئے امتحان کی حیثیت رکھتی ہے۔

عینی شاہدین اور طبی عملے کے مطابق، پہلا حملہ غزہ کے گنجان آباد  علاقے رمال میں ایک گاڑی پر ہوا، جس سے گاڑی میں آگ لگ گئی۔ فوری طور پر یہ واضح نہیں ہو سکا کہ ہلاک ہونے والے پانچ افراد گاڑی کے مسافر تھے یا راہگیر۔ درجنوں لوگ آگ بجھانے اور متاثرین کو بچانے کے لیے موقع پر پہنچے۔

حماس کی وزارت صحت کے مطابق گاڑی پر حملے کے کچھ دیر بعد اسرائیلی فضائیہ نے وسطی غزہ میں دیر البلح شہر اور نصیرات کیمپ میں دو گھروں پر الگ الگ حملے کیے، جن میں کم از کم چار افراد ہلاک اور کئی زخمی ہوئے۔

اسرائیلی فوج نے کہا کہ ایک مسلح شخص نے غزہ میں اسرائیل کے زیرِ قبضہ علاقے میں داخل ہو کر "انسانی ہمدردی کے راستے" کا غلط استعمال کیا، جس کے ذریعے جنوبی غزہ میں امداد پہنچتی ہے اور اسے جنگ بندی کی "کھلی خلاف ورزی" قرار دیا۔  

حماس کے ایک اہلکار نے اسرائیلی فوج کے الزامات کو بے بنیاد اور "قتل کا بہانہ" قرار دیتے ہوئے کہا کہ گروپ جنگ بندی کے معاہدے پر قائم ہے۔

10 اکتوبر کو دو سالہ غزہ جنگ میں سیز فائر کے بعد اس تنازعہ کی شدت میں  کمی آئی ہے، جس سے لاکھوں فلسطینی غزہ  واپس لوٹ سکے ہیں۔ اسرائیل نے غزہ شہر سے فوجی دستے واپس بلا لیے ہیں جبکہ  امداد کی فراہمی میں اضافہ ہوا ہے۔

تاہم، تشدد مکمل طور پر ختم نہیں ہوا۔ حماس دوبارہ اپنی طاقت جمع کرنے کی کوشش کر رہی ہے اور کچھ حلقے علاقے کی عملی تقسیم پر تشویش ظاہر کر رہے ہیں، جہاں حالات اب بھی سنگین ہیں۔ فلسطینی صحت حکام کے مطابق جنگ بندی کے بعد سے اسرائیلی حملوں میں غزہ میں 316 افراد ہلاک ہو چکے ہیں۔

اسرائیل کا کہنا ہے کہ جنگ بندی کے آغاز سے اب تک اس کے تین فوجی مارے گئے ہیں اور اس نے درجنوں جنگجوؤں کو نشانہ بنایا ہے۔ اسرائیل اور حماس بار بار جنگ بندی کی خلاف ورزیوں پر ایک دوسرے کو موردِ الزام ٹھہراتے رہے ہیں۔