غزہ پٹی میں اسرائیلی حملوں میں 13 افراد ہلاک

غزہ (ڈیلی اردو) غزہ میں صحت کے حکام کے مطابق اس ساحلی پٹی کے سارے علاقے میں اسرائیلی حملوں میں کم از کم 13 افراد ہلاک ہو گئے ہیں۔ دوسری طرف امریکی صدر ڈونلڈ ٹرمپ کی طرف سے جنگ بندی کی نگرانی کے لیے ’’بورڈ آف پیس‘‘ کا اعلان متوقع ہے۔

غزہ پٹی میں محکمہ صحت کے حکام اور متاثرین کے خاندانوں کے ارکان نے بتایا کہ شمالی غزہ پٹی اور غزہ شہر کے مشرق میں ہونے والے متعدد حملوں کے نتیجے میں ہلاک ہونے والوں میں کم از کم ایک بچہ بھی شامل ہے۔

اسرائیلی فوج کے مطابق اس نے غزہ سٹی کے علاقے سے عسکریت پسندوں کی جانب سے کیے گئے ایک ناکام راکٹ حملے کے جواب میں جنوبی اور شمالی غزہ میں حماس کے بنیادی ڈھانچوں اور جنگجوؤں کو نشانہ بنایا۔

اسرائیل اور حماس کے درمیان مرحلہ وار جنگ بندی ابھی اپنے ابتدائی مرحلے میں ہے کیونکہ غزہ پٹی میں موجود آخری اسرائیلی یرغمالی کی جسمانی باقیات کی واپسی کے لیے کوششیں ابھی تک جاری ہیں۔

حکام کے مطابق توقع ہے کہ امریکی صدر ٹرمپ اگلے ہفتے اس ’’بورڈ آف پیس‘‘ کے لیے تقرریوں کا اعلان کریں گے، جس کی سربراہی وہ خود کریں گے۔ یہ ان کے مشرق وسطیٰ امن منصوبے کے لیے ایک اہم قدم ہو گا۔ اسرائیل اور حماس کے درمیان تقریباً تین ماہ قبل ہونے والی جنگ بندی کے بعد سے یہ عمل سست روی کا شکار ہے۔

ایک امریکی اہلکار اور ایک دوسرے عہدیدار نے باضابطہ اعلان سے قبل یہ معلومات اپنے نام ظاہر نہ کرنے کی شرط پر مہیا کیں۔

اسرائیل اور حماس نے ایک دوسرے پر اس جنگ بندی کی خلاف ورزی کا الزام بھی لگایا ہے، جو 10 اکتوبر کو نافذ ہوئی تھی۔

مقامی محکمہ صحت کے حکام کے مطابق جنگ بندی کے بعد سے غزہ پٹی میں اب تک جاری اسرائیلی حملوں میں 400 سے زائد فلسطینی ہلاک ہو چکے ہیں۔

دوسری طرف اسرائیلی فوج کا کہنا ہے کہ جنگ بندی کے آغاز کے بعد سے کی جانے والی عسکری کارروائیاں معاہدے کی خلاف ورزیوں کے جواب میں کی گئیں۔