غزہ پٹی میں پولیس کی گاڑی پر اسرائیلی فضائی حملہ، آٹھ افراد ہلاک

غزہ (ڈیلی اردو) غزہ پٹی کے فلسطینی علاقے کے وسطی حصے میں اتوار 15 مارچ کے روز فلسطینی عسکریت پسند تنظیم حماس کے زیر انتظام کام کرنے والی مقامی پولیس فورس کی ایک گاڑی پر اسرائیل کے ایک فضائی حملے میں مجموعی طور پر کم از کم آٹھ افراد ہلاک ہو گئے۔

طبی ذرائع کے مطابق اس فضائی حملے میں حماس کی پولیس فورس کے ارکان کو باقاعدہ ٹارگٹ کر کے ہلاک کیا گیا۔ تاہم اس حملے میں صرف غزہ پولیس کے اہلکار ہی ہلاک نہیں ہوئے۔

غزہ پٹی میں طبی شعبے کے کارکنوں نے بتایا کہ دو سال تک جاری رہنے والی جنگ سے تباہ شدہ اس بہت گنجان آباد فلسطینی ساحلی علاقے کے وسطی حصے میں نصیرات نامی مہاجر کیمپ میں ایک مکان پر کیے گئے ایک اسرائیلی فضائی حملے میں بھی کم از کم چار فلسطینی مارے گئے۔

ان چار ہلاک شدگان میں دو کم عمر لڑکے اور ایک حاملہ عورت بھی شامل ہے۔ حملے کی جگہ کے قریب ہی واقع الاقصیٰ ہسپتال کے ذرائع کے مطابق یہ حملہ جس گھر پر کیا گیا، وہاں رہنے والے 30 سے 40 سال کے درمیان کی عمر کے ایک جوڑے کے ساتھ اس کا 10 سالہ بیٹا بھی اس فضائی حملے میں ہلاک ہو گیا۔

مکان پر حملے میں مرنے والے چوتھا فلسطینی ہدف بنائے گئے خاندان کے ہمسائے میں رہنے والے خاندان کا ایک 15 سالہ لڑکا تھا۔ اس لڑکے کا ایک چھوٹا بھائی بھی اس حملے میں زخمی ہو گیا۔