فلسطین: غزہ پٹی پر اسرائیلی فضائی حملے، 7 افراد ہلاک

غزہ (ڈیلی اردو) غزہ پٹی کے جنگ زدہ فلسطینی علاقے میں حماس اور اسرائیل کے مابین فائر بندی کے باوجود نئے اسرائیلی فضائی حملوں میں اس علاقے کی حماس کے زیر انتظام کام کرنے والے وزارت صحت کے مطابق منگل 26 مئی کے روز کم از کم سات افراد ہلاک ہو گئے۔

یہ نئے اسرائیلی حملے غزہ پٹی میں دوبارہ شروع ہو جانے والی خونریزی کے سلسلے کی تازہ ترین کڑی ہیں اور اس دوران سات میں سے پانچ افراد ایک ہی اسرائیلی حملے میں مارے گئے۔

غزہ سٹی سے ملنے والی رپورٹوں کے مطابق وزارت صحت کی طرف سے بتایا گیا کہ یہ فلسطینی علاقہ، جس کا وسیع تر حصہ ابھی تک اسرائیلی فوج کے کنٹرول میں ہے، ہر روز پرتشدد واقعات کا سامنا کر رہا ہے۔ اس دوران فلسطینی عسکریت پسند تنظیم حماس کی طرف سے بھی اسرائیلی فوجیوں پر حملے کیے جاتے ہیں۔

غزہ پٹی کی جنگ میں، جو 2023 میں اسرائیل میں سینکڑوں فلسطینی عسکریت پسندوں کے ایک بڑے دہشت گردانہ حملے کے ساتھ شروع ہوئی تھی، گزشتہ برس 10 اکتوبر سے فائر بندی جاری ہے۔

غزہ جنگ میں فائر بندی کی خلاف ورزیاں

غزہ جنگ میں اب تک زیادہ تر نافذ فائر بندی کی اسرائیل اور حماس دونوں ہی کی طرف سے خلاف ورزیاں کی جاتی ہیں اور ان خلاف ورزیوں کا الزام دونوں ہی ایک دوسرے پر عائد کرتے ہیں۔

غزہ سول ڈیفنس ایجنسی، جو حماس کے زیر انتظام ایک ایمرجنسی ریسکیو سروس بھی چلاتی ہے، کی طرف سے بتایا گیا، ’’تازہ اسرائیلی حملوں میں کم از کم سات افراد مارے گئے۔ ان حملوں میں سے ایک میں مشرقی المغازی کے علاقے میں شہریوں کے ایک گروپ کو نشانہ بنایا گیا، جس میں پانچ افراد ہلاک اور متعدد دیگر زخمی ہو گئے۔‘‘

غزہ پٹی میں ان تازہ فلسطینی ہلاکتوں کی الاقصیٰ ہسپتال اور فلسطینی سکیورٹی فورسز نے بھی تصدیق کر دی ہے۔ دوسری طرف اسرائیلی سکیورٹی فورسز نے اس بارے میں کہا کہ وہ اس حوالے سے رپورٹوں کا جائزہ لے رہی ہیں۔