فیس بک اور انسٹاگرام کے جاسوسی کیلئے استعمال ہونیوالے 1500 اکاؤنٹس ڈیلیٹ

نیو یارک (مانیٹرنگ ڈیسک) میٹا یا سابق فیس بک سوشل میڈیا کمپنی نے 1500 فیس بک گروپوں اور ان سے منسلک انسٹا گرام اکاؤنٹس کو ڈیلیٹ کیا ہے، جو لوگوں کی معلومات چرا کر اپنے ہدف کو نشانہ بنانے یا ہیک کرنے کے لیے استعمال کرتے تھے۔

فیس بک کی مالک کمپنی میٹا نے جاسوسی کے لیے فیس بک کا استعمال کرنے والے کرائے کے سائبر فوجیوں پر پابندی لگاتے ہوئے پوری دنیا میں ان کے نشانے پر آئے ہوئے کارکنوں، حکومتی مخالفین اور صحافیوں سمیت تقریباً 50 ہزار افراد کو خبردار کرنا شروع کر دیا ہے۔

رپورٹ کے مطابق فیس بک کی مالک کمپنی نے کہا کہ اس نے کو ب ویبز ٹیکنالوجیز، کوگنیٹ، بلیک کیوب اور بلیو ہاک سی آئی سے منسلک اکاؤنٹس ڈیلیٹ کر دیئے ہیں۔ یہ سب اسرائیل میں تھے یا وہاں سے بنائے گئے تھے۔

میٹا نے بھارت میں قائم بیل ٹروکس، شمالی مقدونیہ کی فرم سائٹروکس اور چین سے ایک نامعلوم شخص کے ساتھ منسلک اکاؤنٹ کو بھی ہٹا دیا ہے۔

میٹا کے ایک بیان میں کہا گیا ہے کہ کرائے کے یہ سائبر فوجی اکثر دعویٰ کرتے ہیں کہ ان کی خدمات صرف مجرموں اور دہشت گردوں کو نشانہ بناتی ہیں۔

مزید کہا گیا کہ ’درحقیقت بلا تفریق نشانہ بنایا جاتا ہے اور اس میں صحافی، منحرف، آمرانہ حکومتوں کے ناقدین، حزب اختلاف کے ارکان کے اہلخانہ اور انسانی حقوق کے کارکن شامل ہیں۔ ہم نے ان پر اپنی سروسز کے استعمال کی پابندی عائد کر دی ہے۔