فیض حمید، قمر باجوہ، عمران خان نے طالبان کو پاکستان میں بسایا، وزیر دفاع خواجہ آصف

اسلام آباد (ڈیلی اردو) پاکستان کے وزیرِ دفاع خواجہ آصف نے دعویٰ کیا ہے کہ سابق آرمی چیف جنرل قمر جاوید باجوہ، سابق ڈی جی آئی ایس آئی لیفٹیننٹ جنرل (ر) فیض حمید اور سابق وزیرِ اعظم عمران خان افغانستان سے چار سے پانچ ہزار طالبان کو پاکستان میں لا کر بسایا۔

ان کے مطابق ان افراد کو ملک میں دو سال تک سہولت کاری فراہم کی گئی۔

خواجہ آصف نے کہا کہ: “قومی اسمبلی میں سوالات اٹھے کہ آپ نے کن لوگوں کو لا کر بسا دیا ہے؟ یہ وہ لوگ ہیں جنہوں نے سوات میں قتلِ عام کیا تھا اور جنہیں ’سوات کے قصائی‘ کہا جاتا ہے۔”

وزیر دفاع نے مزید کہا کہ ماضی میں پاکستان نے جن جنگوں میں حصہ لیا، ان کا پاکستان سے کوئی براہ راست تعلق نہیں تھا، “ہم ان میں کود پڑے اور آج ان کی قیمت ادا کر رہے ہیں۔”

ایک سوال کے جواب میں خواجہ آصف کا کہنا تھا کہ خیبر پختونخوا اور بلوچستان میں افغانستان کے ساتھ سرحدی نظام کو باقاعدہ ضابطے میں لانا ناگزیر ہے کیونکہ انہی راستوں سے "شدت پسند، جرائم پیشہ اور منشیات فروش" داخل ہوتے ہیں۔

انہوں نے واضح کیا کہ غیر قانونی طور پر مقیم افغانوں کو اب وطن واپس جانا چاہیے۔

خیبر پختونخوا حکومت کی جانب سے مذاکرات کی تجویز پر وزیرِ دفاع نے کہا: “ایک صوبے کو وفاق کے ساتھ اپنی پالیسی میں مطابقت لانا ہوگی۔”