قبائلی ضلع باجوڑ میں پولیس گاڑی کے قریب بم دھماکا، 3 اہلکار زخمی

خار (ڈیلی اردو) صوبہ خیبرپختونخوا کے قبائلی ضلع باجوڑ میں پولیس گاڑی کے قریب بم دھماکا ہوا ہے، جس کے نتیجے میں 3 پولیس اہلکار زخمی ہوگئے۔

نجی ٹی وی چینل ڈان نیوز کے مطابق ڈپٹی سپرنٹنڈنٹ آف پولیس (ڈی ایس پی) عبد العزیز نے بتایا کہ دھماکے میں اسٹیشن ہاؤس افسر (ایس ایچ او) شاہ پور خان سمیت دیگر اہلکار محفوظ رہے۔

ان کا کہنا تھا کہ ایس ایچ او شاہ پور خان معمول کی گشت پر تھے، پولیس گاڑی پہلے سے سڑک کے کنارے نصب بم سے ٹکرا گئی۔

ڈی ایس پی نے بتایا کہ زخمیوں کو ہیڈ کواٹر ہسپتال خار منتقل کردیا گیا، مزید کہنا تھا کہ علاقے میں سرچ آپریشن شروع کردیا گیا ہے۔

ڈیلی اردو کے مطابق باجوڑ کی تحصیل سلارزئی میں دہشت گردوں نے پولیس چوکی پر راکٹ لانچر سے حملہ کر دیا تاہم کوئی جانی نقصان نہیں پہنچا۔

واضح رہے کہ 2 روز قبل پشاور کے علاقے خزانہ شوگر مل کے قریب کچرے کے ڈھیر میں بارودی مواد کے دھماکے کے نتیجے میں 10 سالہ بچہ ہلاک ہوگیا تھا۔

خزانہ شوگر مل کے قریب کچرے کے ڈھیر میں دھماکا اس وقت ہوا تھا، جب 10 سالہ بچے نے کچرے سے بارودی مواد کو اٹھایا تھا۔

اس سے قبل 22 ستمبر کو سوات میں غیر ملکی سفرا کے قافلے کی سیکیورٹی پر مامور پولیس وین کو نشانہ بنایا گیا تھا جس کے نتیجے میں ایک اہلکار ہلاک اور چار زخمی ہو گئے تھے۔