قطر حماس کو پناہ دیتا ہے، اسی لیے دوحہ پر حملہ کیا، اسرائیلی وزیرِاعظم نیتن یاہو

یروشلم  (ڈیلی اردو/ایجنسیاں) اسرائیلی وزیرِاعظم بنیامن نیتن یاہو نے کہا ہے کہ قطر کے دارالحکومت دوحہ میں حماس رہنماؤں پر فضائی حملہ ’’بالکل جائز‘‘ تھا کیونکہ قطر حماس کو پناہ اور مالی معاونت فراہم کرتا ہے۔

منگل 16 ستمبر کو ایک پریس کانفرنس سے خطاب کرتے ہوئے نیتن یاہو نے کہا:  ’قطر حماس سے رابطے میں ہے، وہ حماس کو پناہ دیتا ہے، اسے مالی مدد اور معاونت فراہم کرتا ہے۔ سطر کے پاس حماس پر دباؤ ڈالنے کی طاقت تھی مگر اس نے ایسا نہیں کیا۔ لہٰذا ہم نے جو کیا وہ جائز تھا۔‘‘

یہ قطر پر اسرائیلی فوج کا براہِ راست پہلا حملہ تھا جو امریکا کا قریبی اتحادی ہے۔ 9 ستمبر کو کیے گئے اس فضائی حملے میں دوحہ کے مرکز میں حماس رہنماؤں کو نشانہ بنایا گیا تھا۔ اس اقدام پر دنیا بھر میں شدید ردِعمل سامنے آیا۔

پیر کے روز عرب اور اسلامی ممالک کے رہنماؤں نے قطر میں ہنگامی اجلاس بلایا اور مشترکہ بیان میں عالمی برادری پر زور دیا کہ وہ اسرائیل کے ساتھ اپنے سفارتی اور اقتصادی تعلقات پر نظرِ ثانی کریں۔

قطر کے امیر شیخ تمیم بن حمد آلثانی نے بھی اسرائیلی اقدام کو کڑی تنقید کا نشانہ بنایا اور کہا کہ:

’’اسرائیل عرب دنیا کو اپنے اثر و رسوخ کے تحت لانا چاہتا ہے۔ دوحہ پر حملے کا مقصد غزہ سے متعلق مذاکرات کو بند گلی کی طرف دھکیلنا تھا۔‘‘

واضح رہے کہ امریکی صدر ڈونلڈ ٹرمپ نے بعد ازاں کہا تھا کہ اسرائیل نے اس حملے کی اطلاع انہیں تقریباً اسی وقت دی جب کارروائی کی جا رہی تھی، اسی لیے وہ قطری حکام کو آگاہ نہ کر سکے۔ تاہم ٹرمپ نے یقین دہانی کرائی کہ ایسا حملہ دوبارہ نہیں ہوگا۔