قطری وزیراعظم کا تہران کا دورہ، ایران کے ساتھ خطے کی کشیدگی اور آبنائے ہرمز پر بات چیت

تہران(ڈیلی اردو) قطر کے وزیرِاعظم و وزیرِ خارجہ شیخ محمد بن عبدالرحمٰن الثانی نے ایران کا دورہ کیا، جہاں انہوں نے ایرانی وزیرِ خارجہ عباس عراقچی سے ملاقات کی۔ ملاقات میں خطے کی موجودہ صورتحال، کشیدگی میں کمی اور ایران و قطر کے دوطرفہ تعلقات سمیت آبنائے ہرمز سے متعلق امور پر تبادلہ خیال کیا گیا۔

ایرانی میڈیا کے مطابق قطری وزیراعظم کا دورہ ایسے وقت میں ہوا ہے جب خطے میں کشیدگی کم کرنے اور سفارتی رابطوں کے ذریعے معاملات آگے بڑھانے کی کوششیں جاری ہیں۔ ایرانی وزارتِ خارجہ کے ترجمان اسماعیل بقائی نے کہا کہ قطر نے حالیہ عرصے میں کشیدگی کم کرنے کی کوششوں میں اہم کردار ادا کیا ہے۔

قطری وزارتِ خارجہ کے مطابق ملاقات میں خطے میں کشیدگی کم کرنے اور مذاکرات کے لیے سازگار ماحول پیدا کرنے کے اقدامات پر بھی گفتگو ہوئی۔ دونوں جانب سے آبنائے ہرمز میں عارضی بحری راہداری اور سمندری حدود سے بارودی سرنگیں صاف کرنے کے مجوزہ منصوبے پر بھی بات چیت کی گئی۔

اس سے ایک روز قبل عمان کے وزیرِ خارجہ سید بدر بن حمد البوسعیدی نے بھی تہران میں عباس عراقچی سے ملاقات کی تھی، جس میں آبنائے ہرمز میں عارضی بحری راہداری کے قیام اور بارودی سرنگوں کی صفائی سے متعلق تعاون پر اتفاق کیا گیا تھا۔

قطری وزیراعظم کا دورہ خطے میں جاری سفارتی رابطوں کا حصہ قرار دیا جا رہا ہے، تاہم آبنائے ہرمز کو مکمل طور پر کھولنے سے متعلق کوئی حتمی فیصلہ سامنے نہیں آیا۔