قلات :مسافر بس پر اندھا دھند فائرنگ، 3 افراد ہلاک، متعدد زخمی

قلات(ڈیلی اردو) بلوچستان کے ضلع قلات میں نیمرغ کراس کے مقام پر ایک مسافر بس پر ہونے والی فائرنگ سے کم از کم تین افراد ہلاک جبکہ سات سے زائد زخمی ہو گئے۔ فائرنگ کا یہ واقعہ اُس وقت پیش آیا جب مذکورہ بس کوئٹہ کی جانب رواں دواں تھی۔

پولیس ذرائع کے مطابق نامعلوم مسلح افراد نے اچانک بس کو نشانہ بنایا۔ ایس ایچ او قلات، حبیب نیچاری نے تصدیق کی کہ ہلاک اور زخمی افراد کو فوری طور پر ڈسٹرکٹ ہیڈ کوارٹر اسپتال منتقل کر دیا گیا، جہاں ایمرجنسی نافذ کر دی گئی ہے۔

بلوچستان حکومت کے ترجمان شاہد رند نے بتایا کہ سیکیورٹی فورسز اور ریسکیو ٹیمیں جائے وقوعہ پر پہنچ چکی ہیں اور پورے علاقے کو گھیرے میں لے کر سرچ آپریشن شروع کر دیا گیا ہے۔

ابتدائی اطلاعات کے مطابق بس میں سوار زیادہ تر افراد کا تعلق قوال برادری سے تھا جو کوئٹہ میں ایک شادی کی تقریب میں قوالی کے لیے جا رہے تھے۔ ایک زخمی مسافر نے بتایا کہ حملے کے وقت بس میں معروف قوال امجد صابری کے رشتہ دار بھی موجود تھے۔

تاحال حملے کے محرکات واضح نہیں ہو سکے۔ کسی گروہ نے واقعے کی ذمہ داری بھی قبول نہیں کی۔

وفاقی وزیر داخلہ محسن نقوی نے واقعے کی شدید مذمت کرتے ہوئے متاثرہ خاندانوں سے اظہار تعزیت کیا ہے۔ ان کا کہنا تھا کہ بھارت کی پشت پناہی سے سرگرم دہشتگردوں کی ہر سازش کو عوام کے تعاون سے ناکام بنایا جائے گا۔