لبنان میں فائر بندی کے بعد پہلی بار دو اسرائیلی فوجی دھماکے میں ہلاک

یروشلم/بیروت (ڈیلی اردو) اسرائیلی فوج نے تصدیق کی ہے کہ لبنان میں ایران نواز شیعہ ملیشیا حزب اللہ کے ساتھ جون میں ہونے والی فائر بندی کے بعد پہلی بار جنوبی لبنان میں ایک دھماکے کے نتیجے میں دو اسرائیلی فوجی ہلاک جبکہ چار دیگر زخمی ہوگئے ہیں۔

اسرائیلی فوج کے مطابق واقعہ جنوبی لبنان کے اس علاقے میں پیش آیا جو گزشتہ کئی ماہ سے اسرائیلی فوج کے کنٹرول میں ہے اور ماضی میں حزب اللہ کا مضبوط گڑھ سمجھا جاتا تھا۔

فوجی بیان میں کہا گیا کہ دھماکے میں دو اہلکار ہلاک اور چار زخمی ہوئے، تاہم دھماکے کی نوعیت اور استعمال ہونے والے دھماکہ خیز مواد کے بارے میں تحقیقات جاری ہیں۔

اسرائیلی فوج کے ایک اہلکار نے نام ظاہر نہ کرنے کی شرط پر بتایا کہ فوجیوں کی گاڑی جنوبی لبنان کے گاؤں مجدل زون میں داخل ہوتے ہی دھماکہ خیز مواد کی زد میں آگئی، جس کے نتیجے میں یہ جانی نقصان ہوا۔

اسرائیلی میڈیا نے ان ہلاکتوں کی خبر بدھ کو دی تھی، جبکہ فوج نے جمعرات کو باضابطہ طور پر اس کی تصدیق کی۔

دوسری جانب اسرائیلی فوج نے بدھ کے روز جنوبی لبنان میں حزب اللہ کے مبینہ ٹھکانوں پر نئے فضائی حملے بھی کیے۔ اسرائیل کا کہنا ہے کہ یہ کارروائی حزب اللہ کی جانب سے جنگ بندی معاہدے کی مبینہ خلاف ورزی کے جواب میں کی گئی۔

لبنانی وزارت صحت کے مطابق اسرائیلی فضائی حملوں میں کم از کم دو افراد ہلاک جبکہ 20 دیگر زخمی ہوئے ہیں۔

جون میں اسرائیل اور حزب اللہ کے درمیان فائر بندی معاہدے کے بعد دونوں فریقوں کے درمیان بڑے پیمانے پر لڑائی رکی ہوئی ہے، تاہم وقفے وقفے سے حملوں اور جھڑپوں کے باعث سرحدی علاقوں میں کشیدگی برقرار ہے۔