لوئر کرم و صدہ قبائل کا ایک سالہ جنگ بندی معاہدہ، قبائلی جرگے میں اعلان

کرم (ڈیلی اردو) قبائلی روایات اور اجتماعی دانش کا مظاہرہ کرتے ہوئے لوئر کرم اور صدہ کے متحارب قبائل نے ایک سال کے لیے جنگ بندی کا باقاعدہ اعلان کر دیا، جسے علاقے میں پائیدار امن کے قیام کی طرف اہم پیش رفت قرار دیا جا رہا ہے۔

یہ اہم فیصلہ ایف سی فورٹ صدہ میں منعقدہ ایک بڑے قبائلی جرگے کے دوران سامنے آیا، جس میں طوری اور بنگش قبائل کے عمائدین کے علاوہ ضلعی انتظامیہ، سکیورٹی فورسز اور پولیس کے اعلیٰ حکام نے شرکت کی۔ ڈپٹی کمشنر کرم اشفاق خان کے مطابق فریقین نے امن تیگہ کے دوران "معاہدہ مری" اور "تجدید مری کوہاٹ" پر مکمل عمل درآمد کا عزم ظاہر کیا۔

قبائلی مشران نے اس اقدام کو صرف جنگ بندی نہیں بلکہ علاقائی استحکام کی بنیاد قرار دیا، اور کہا کہ یہ فیصلہ امن، بھائی چارے اور مشترکہ مفاد کے تحت کیا گیا ہے۔ جرگے کے شرکا نے فورسز، پولیس اور ضلعی انتظامیہ کی کوششوں کو سراہتے ہوئے کہا کہ وادی کرم میں امن کا قیام عوامی حمایت اور سیکیورٹی اداروں کی قربانیوں کا نتیجہ ہے۔

ڈپٹی کمشنر نے اس موقع پر اس عزم کا اظہار کیا کہ تمام فریقین کو ساتھ لے کر آگے بڑھا جائے گا اور علاقے کو مکمل طور پر پرامن اور خوشحال بنانے کے لیے مزید اقدامات کیے جائیں گے۔