لکی مروت اور بنوں میں شدت پسندوں کے حملے، ایف سی اہلکار ہلاک، پولیس اسٹیشن پر دستی بم حملہ

لکی مروت + بنوں (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت اور بنوں میں شدت پسندوں نے جمعرات کی شب دو الگ الگ حملے کیے۔

پولیس کے مطابق لکی مروت کے علاقے وندا کریم خان میں شدت پسندوں نے ٹارگٹ فائرنگ کی، جس کے نتیجے میں فرنٹیئر کور (ایف سی) کے اہلکار بصیراللہ اور ان کے بھائی احسان اللہ موقع پر ہلاک ہوگئے۔

 بصیراللہ چھٹیوں پر اپنے خاندان سے ملاقات کے لیے آئے ہوئے تھے۔ واقعہ اس وقت پیش آیا جب دونوں ہوٹل سے گھر واپس جا رہے تھے۔ حملہ آور موقع سے فرار ہوگئے اور پولیس نے انہیں گرفتار کرنے کے لیے سرچ آپریشن شروع کر دیا ہے۔

اسی دوران، ضلع بنوں کے میریان پولیس اسٹیشن پر شدت پسندوں نے دو دستی بم پھینکے، جو دیوار سے ٹکرا کر دھماکے سے پھٹ گئے۔ خوش قسمتی سے اس حملے میں کوئی جانی نقصان نہیں ہوا۔

پولیس نے علاقے کو گھیرے میں لے کر شواہد اکٹھے کیے اور واقعے کے ذمہ داروں کو گرفتار کرنے کے لیے اقدامات شروع کر دیے ہیں۔