لکی مروت: مارٹر گولہ پھٹنے سے 5 بچے ہلاک، 12 افراد زخمی، ہسپتال میں ایمرجنسی نافذ

لکی مروت (ڈیلی اردو ) خیبر پختونخوا کے ضلع لکی مروت کے علاقے سربند میں افسوسناک واقعے کے دوران مارٹر گولہ پھٹنے سے 5 بچے ہلاک اور 12 افراد زخمی ہو گئے، جن میں 10 بچے شامل ہیں۔

ہسپتال ذرائع کے مطابق ہلاک ہونے والوں میں 4 بچیاں اور ایک بچہ شامل ہے، جن کی عمریں دو سے سات سال کے درمیان بتائی جا رہی ہیں۔ زخمیوں کو فوری طور پر سٹی ہسپتال منتقل کیا گیا، جہاں ایمرجنسی نافذ کر کے طبی عملے کو الرٹ کر دیا گیا ہے۔

ایم ایس سٹی ہسپتال کے مطابق مجموعی طور پر 17 افراد کو اسپتال لایا گیا، جن میں متعدد کی حالت تشویشناک ہے۔ زخمیوں کو فوری طبی امداد فراہم کی جا رہی ہے۔

واقعے کے حوالے سے متضاد اطلاعات سامنے آئی ہیں۔ کچھ بچوں نے بتایا کہ انہیں ایک مارٹر گولہ یا راکٹ نما چیز ملی تھی، جسے کھیلتے ہوئے تالاب میں پھینکا گیا، جس کے بعد زوردار دھماکہ ہوا۔ جبکہ دیگر کا کہنا ہے کہ یہ چیز اوپر سے آ گری، اور اچانک پھٹ گئی۔

پولیس اور بم ڈسپوزل اسکواڈ نے علاقے کو گھیرے میں لے کر تحقیقات شروع کر دی ہیں، جبکہ ضلعی انتظامیہ نے واقعے کی مکمل رپورٹ طلب کر لی ہے۔