لکی مروت میں طالبان کا نیشنل بینک پر حملہ، لوٹ مار کے بعد برانچ کو آگ لگا دی گئی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع لکی مروت میں دہشتگردوں نے نیشنل بینک کی تترخیل برانچ پر حملہ کیا، چوکیدار کو یرغمال بنانے کے بعد نقدی اور قیمتی سامان لوٹ لیا گیا، جبکہ جاتے ہوئے ملزمان نے برانچ کو آگ لگا دی۔

پولیس کے مطابق بدھ اور جمعرات کی درمیانی شب ہونے والے اس واقعے میں دہشتگردوں نے پہلے بینک کے چوکیدار کو قابو میں لیا اور اسے یرغمال بنا کر واردات کی۔ ملزمان نے بینک سے نقدی، کمپیوٹرز اور دیگر قیمتی سامان لوٹنے کے بعد اندر موجود کیمرے اور دیگر آلات بھی توڑ دیے۔

ذرائع کا کہنا ہے کہ دہشتگردوں نے واپسی سے قبل برانچ کے اندر موجود فرنیچر، ریکارڈ اور سامان کو آگ لگا دی جس کے باعث کمپیوٹرز اور دیگر قیمتی املاک جل کر خاکستر ہو گئیں۔ آگ لگنے سے عمارت کو بھی شدید نقصان پہنچا۔

واقعہ کے بعد علاقے میں خوف و ہراس پھیل گیا جبکہ پولیس اور سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ پولیس حکام کے مطابق دہشتگردوں کی تلاش کے لیے مختلف پہلوؤں پر تحقیقات جاری ہیں۔