لکی مروت میں عسکریت پسندوں کی فائرنگ سے دو پولیس اہلکار ہلاک

لکی مروت (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع لکی مروت میں تھانہ سٹی کی حدود مچن خیل اڈہ میں عسکریت پسندوں کی فائرنگ سے دو پولیس اہلکار ہلاک ہوگئے۔ پولیس کے مطابق حملہ آور موقع سے فرار ہونے میں کامیاب ہوگئے جن کی تلاش جاری ہے۔

دریں اثنا لکی مروت کے شیرخیل علاقے میں ایک مسجد کے قریب پاکستانی طالبان کی جانب سے ’امن ملیشیا‘ کو نشانہ بنانے کے لیے رکھی گئی موٹرسائیکل بم دھماکے سے پہلے ہی پھٹ گئی۔ اس دھماکے میں بم بنانے کے شبہ میں دو افراد بھی زخمی ہو گئے۔ 

گزشتہ چند ماہ کے دوران خیبرپختونخوا کے مختلف اضلاع بشمول بنوں، پشاور، کرک، لکی مروت اور باجوڑ میں پولیس پر دہشت گرد حملوں میں نمایاں اضافہ دیکھنے میں آیا ہے۔ خاص طور پر جولائی میں ضلع بنوں پولیس کو کئی حملوں کا سامنا کرنا پڑا۔

گزشتہ ماہ پولیس اور سیکیورٹی فورسز نے بنوں کے حوید اور وزیرآباد کے علاقوں میں کارروائیاں کرتے ہوئے 14 دہشت گردوں کے سہولت کاروں کو گرفتار کر کے ان کے ٹھکانے تباہ کیے تھے۔

اسی طرح 3 اگست کو بنوں میں ایک چیک پوسٹ پر دہشت گردوں کے حملے میں ایک پولیس کانسٹیبل ہلاک جبکہ تین اہلکار زخمی ہوگئے تھے۔ جوابی کارروائی میں تین دہشت گرد مارے گئے تھے۔

جولائی میں بھی میر یان پولیس اسٹیشن کو ڈرون حملے کے ذریعے نشانہ بنایا گیا تھا، جو ایک ماہ میں پانچویں مرتبہ اس تھانے پر دہشت گرد حملہ تھا۔