لکی مروت میں پولیس بکتر بند گاڑی کے قریب دھماکا، بنوں میں تھانہ ہوید پر حملہ

لکی مروت/بنوں (نمائندگان ڈیلی اردو) پاکستان کے شورش زدہ صوبے خیبر پختونخوا کے شورش زدہ ضلع لکی مروت میں میانوالی روڈ پر وانڈہ شجاع کے قریب پولیس کی بکتر بند گاڑی کو اس وقت نشانہ بنایا گیا جب پولیس پارٹی اشتہاری ملزمان کے خلاف چھاپہ مار کارروائی سے واپس آرہی تھی۔ پولیس کے مطابق اچانک بکتر بند گاڑی کے قریب آئی ای ڈی دھماکہ ہوا، جس کے نتیجے میں گاڑی کو نقصان پہنچا، تاہم خوش قسمتی سے تمام اہلکار محفوظ رہے۔ 

واقعے کے بعد پولیس نے علاقے کو گھیرے میں لے کر سرچ آپریشن شروع کردیا۔

دوسری جانب ضلع بنوں میں تھانہ ہوید کو شدت پسندوں نے نشانہ بنانے کی کوشش کی۔ 

ڈسٹرکٹ پولیس آفیسر سلیم عباس کے مطابق شرپسندوں نے حملے کی کوشش کی مگر پولیس اہلکاروں اور مقامی عوام کی بروقت مزاحمت کے باعث یہ کارروائی ناکام بن گئی اور حملہ آور فرار ہوگئے۔

ڈی پی او بنوں نے کہا کہ عوام اور پولیس کا اتحاد اس بات کا واضح ثبوت ہے کہ دہشت گردوں کے ناپاک عزائم کو کامیاب نہیں ہونے دیا جائے گا۔ ان کا کہنا تھا کہ امن اور تحفظ کی یہ مشترکہ جنگ عوام اور پولیس کے تعاون سے ہی جیتی جا سکتی ہے۔