محمد بن سلمان کی امریکی سینٹکام کمانڈر سے ملاقات، خطے کی صورتحال پر تبادلہ خیال

ریاض (ڈیلی اردو) سعودی ولی عہد اور وزیراعظم محمد بن سلمان نے جدہ میں امریکی سینٹرل کمانڈ کے سربراہ ایڈمرل بریڈ کوپر سے ملاقات کی، جس کے دوران خطے میں تیزی سے بدلتی ہوئی صورتحال اور سیکیورٹی معاملات پر گفتگو کی گئی۔

سعودی سرکاری ذرائع کے مطابق یہ ملاقات ایسے وقت میں ہوئی ہے جب یمن میں ایران نواز حوثی باغیوں اور سعودی عرب کے درمیان کشیدگی میں اضافہ دیکھا جا رہا ہے۔ حوثی باغیوں کی جانب سے سعودی شہروں اور توانائی کے بنیادی ڈھانچے کو نشانہ بنانے کے دعوے بھی سامنے آتے رہے ہیں۔

ملاقات سے چند روز قبل بعض ذرائع نے دعویٰ کیا تھا کہ محمد بن سلمان نے امریکی صدر ڈونلڈ ٹرمپ سے حوثی باغیوں کے خلاف کارروائیوں میں عسکری معاونت طلب کی تھی۔ اطلاعات کے مطابق امریکہ نے براہ راست فضائی حملوں کے بجائے سعودی عرب کو انٹیلی جنس تعاون اور اہداف کی نشاندہی میں مدد فراہم کرنے پر آمادگی ظاہر کی ہے۔

علاقائی کشیدگی کے دوران حوثی باغیوں کی یمن کے بحیرہ احمر کے ساحلی علاقوں میں پیش قدمی اور باب المندب کے قریب سرگرمیوں نے بھی تشویش میں اضافہ کیا ہے۔ باب المندب عالمی بحری تجارت کے لیے ایک اہم گزرگاہ ہے۔

موجودہ صورتحال کے باعث سعودی تیل کی برآمدات، بحری تجارت اور خطے میں توانائی کی تنصیبات کے تحفظ سے متعلق خدشات بھی بڑھ گئے ہیں۔