مردان میں پولیس چوکی پر دہشتگرد حملہ ناکام، ایک حملہ آور ہلاک

مردان(ڈیلی ارددو) خیبرپختونخواہ کے شورش زدہ ضلع مرادن میں تخت بھائی کے علاقے سیرے بہلول میں پولیس چوکی پر دہشتگردوں کی جانب سے حملے کی کوشش پولیس اہلکاروں نے بروقت جوابی کارروائی کرتے ہوئے ناکام بنا دی۔ فائرنگ کے تبادلے میں ایک دہشتگرد ہلاک جبکہ دو پولیس اہلکار زخمی ہوگئے۔

پولیس کے مطابق دہشتگردوں نے تھانہ تخت بھائی کی حدود میں قائم سیرے بہلول پولیس چوکی کو نشانہ بنانے کی کوشش کی، تاہم اہلکاروں نے فوری جوابی کارروائی کی، جس کے نتیجے میں حملہ آوروں کا منصوبہ ناکام ہوگیا اور ایک دہشتگرد مارا گیا۔

فائرنگ کے دوران پولیس اہلکار عبداللہ اور محمد شاہ زخمی ہوئے، جنہیں طبی امداد کے لیے تحصیل ہیڈکوارٹر اسپتال تخت بھائی منتقل کردیا گیا۔

واقعے کے بعد پولیس کی مزید نفری موقع پر پہنچ گئی اور علاقے کو گھیرے میں لے کر سرچ آپریشن شروع کردیا گیا۔ سیکیورٹی اہلکاروں نے ممکنہ خطرے کے پیش نظر اطراف کے علاقوں میں بھی نگرانی بڑھا دی۔

پولیس حکام کا کہنا ہے کہ علاقے میں امن و امان برقرار رکھنے اور کسی بھی ممکنہ دہشتگرد کارروائی کا بروقت مقابلہ کرنے کے لیے سیکیورٹی اقدامات مزید سخت کیے گئے ہیں۔