مستونگ میں دہشتگردی کی نئی لہر، دو سیکیورٹی اہلکار ہلاک، پانچ زخمی

مستونگ (ڈیلی اردو) بلوچستان کے ضلع مستونگ میں دہشتگردی کے دو الگ الگ واقعات میں سیکیورٹی فورسز کو نشانہ بنایا گیا، جس کے نتیجے میں بلوچستان کانسٹیبلری کے دو اہلکار ہلاک جبکہ پانچ اہلکار زخمی ہو گئے۔ جاں بحق ہونے والوں میں قائم مقام ڈی ایس پی عبدالرزاق بھی شامل ہیں۔

تفصیلات کے مطابق، قلات سے کوئٹہ جانے والی سیکیورٹی اہلکاروں کی گاڑی پر چُھوتُو کے علاقے میں نامعلوم مسلح افراد نے گھات لگا کر حملہ کیا۔ فائرنگ کی زد میں آ کر ڈی ایس پی عبدالرزاق اور ایک اور اہلکار موقع پر ہلاک ہو گئے، جب کہ دو اہلکار زخمی حالت میں قریبی اسپتال منتقل کیے گئے، جہاں ابتدائی طبی امداد کے بعد انہیں کوئٹہ ریفر کر دیا گیا۔

دوسری جانب، مستونگ کے علاقے کردگاپ کے مقام سربند میں لیویز فورس کی ایک چیک پوسٹ پر بھی فائرنگ کا واقعہ پیش آیا، جہاں تین اہلکار زخمی ہوئے۔ واقعے کے بعد فورسز نے علاقے میں سرچ آپریشن شروع کر دیا ہے۔

بلوچستان حکومت کے ترجمان شاہد رند نے ان حملوں کو بزدلانہ کارروائی قرار دیتے ہوئے کہا کہ ایسی کارروائیاں امن کے قیام میں رکاوٹ ڈالنے کی ناکام کوشش ہیں۔ ان کا کہنا تھا کہ حملہ آوروں کی شناخت اور گرفتاری کے لیے تحقیقات کا دائرہ وسیع کر دیا گیا ہے اور دہشتگردوں کو جلد قانون کے کٹہرے میں لایا جائے گا۔

ترجمان نے واضح کیا کہ بلوچستان کے عوام اور سیکیورٹی ادارے ملک دشمن عناصر کے سامنے ہرگز جھکیں گے نہیں اور قربانیوں کے ذریعے امن کے قیام کی کوششیں جاری رکھی جائیں گی۔