مشرق وسطیٰ میں کشیدگی: امریکی نیوی کا ڈسٹرائر اسرائیل کی بندرگاہ پر تعینات

یروشلم/تہران (ڈیلی اردو/بی بی سی)ایرانی صدر مسعود پزشکیان نے خبردار کیا ہے کہ ’’کسی بھی جارحیت کے خلاف‘‘ فوری اور مؤثر ردعمل ظاہر کیا جائے گا۔ ایرانی میڈیا نے بتایا ہے کہ پزشکیان نے جمعے کے دن متحدہ عرب امارات کے صدر کو بتایا ہے کہ تہران حکومت جنگ نہیں چاہتی اور مذاکرات کے لیے تیار ہے۔ 

دوسری طرف ترکی کے وزیر خارجہ ہاکان فیدان نے واشنگٹن پر زور دیا ہے کہ اسرائیلی دباؤ میں آ کر ایران پر حملہ کرنے سے باز رہے۔ انہوں نے کہا ہے کہ ایسی کسی کارروائی سے پورا خطہ متاثر ہو گا۔

استنبول میں ایرانی وزیر خارجہ عباس عراقچی سے ملاقات کے بعد ایک پریس کانفرنس میں فیدان نے مزید کہا کہ وہ دیکھ رہے ہیں کہ اسرائیل امریکہ پر دباؤ ڈال رہا ہے کہ وہ ایران پر حملہ کرے، ’’ہمیں امید ہے کہ امریکی انتطامیہ کامن سنس سے کام لیتے ہوئے ایسا نہیں کرے گی۔‘‘

دریں اثنا اسرائیلی میڈیا نے رپورٹ کیا ہے کہ یو ایس نیوی کا ایک ڈسٹرائر ایلات کی بندرگاہ پر لنگر انداز ہو چکا ہے۔ یہ جنگی بحری بیڑہ ایک ایسے وقت میں تعینات کیا گیا ہے، جب ایران اور امریکہ کے مابین کشیدگی میں اضافہ ہوتا جا رہا ہے۔

تاہم امریکی صدر ڈونلڈ ٹرمپ نے امید ظاہر کی ہے کہ ایران کے خلاف فوجی کارروائی سے بچا جا سکتا ہے۔ 

صدر ٹرمپ نے اعتراف کیا ہے کہ ایران کے ساتھ بات چیت جاری ہے اور فوجی آپریشن سے گریز کا امکان موجود ہے۔ واضح رہے کہ انہوں نے چند روز قبل ہی کہا تھا کہ ایران کے پاس جوہری معاہدے پر بات چیت کے لیے وقت کم رہ گیا ہے۔ ایران نے کسی بھی حملے کی صورت میں امریکی اڈوں اور بحری بیڑوں کو نشانہ بنانے کی دھمکی دے رکھی ہے۔