مغربی کنارے میں اسرائیلی فوج کے ساتھ جھڑپوں میں متعدد فلسطینی زخمی

غزہ (ڈیلی اردو) فلسطین کے مقبوضہ مغربی کنارے کے شہر اریحا کے جنوب مغرب میں عقبہ جبر کیمپ میں اسرائیلی فوجیوں کے ساتھ جھڑپوں کے دوران ایک فلسطینی بچے سمیت متعدد فلسطینی زخمی ہو گئے۔

فلسطینی وزارت صحت نے بتایا کہ اسرائیلی فوجیوں کی طرف سے عقبہ جبر میں ایک بچے کے سرمیں گولی ماری گئی جسے شدید زخمی حالت میں اریحا ہسپتال منتقل کیا گیا۔

نابلس اور قلقیلیہ میں آبادکاری مخالف مارچ کو کچلنے کے بعد قابض فورسز کے ساتھ جھڑپوں کے دوران متعدد شہری زخمی بھی ہوئے۔

جبل صبیح کے قرب و جوار میں جھڑپیں شروع ہوئیں۔ اس دوران اسرائیلی فوجیوں نے ربڑ کی گولیوں اور زہریلی گیس کے بم برسائے جبکہ فلسطینی نوجوانوں نے ربڑ کے ٹائروں کو آگ لگا دی اور اسرائیلی فوجیوں پر پتھراؤ کیا۔

مشرق میں واقع گائوں بیت دجن میں قصبے کی زمین پر ہفتہ وار آبادکاری مخالف مارچ کے آغاز کے بعد جھڑپیں ہوئیں۔ اس دوران اسرائیلی فوج نے شہریوں کو ربڑ کی گولیوں اور زہریلی گیس کے بموں سے نشانہ بنایا۔

میڈیکل ریلیف اتھارٹی نے اطلاع دی کہ اس کے عملے نے بیت دجن میں اسرائیلی فوج کے ساتھ جھڑپوں کے دوران 10 زخمیوں کو طبی امداد فراہم کی۔ بیت دجن قصبے میں اکتوبر 2020 سے ہفتہ وار احتجاجی مظاہرے ہو رہے ہیں۔ ان مظاہروں کا مقصد قصبے کی زمینوں کے شمال مشرقی علاقے میں آبادکاری کے خلاف احتجاج کرنا ہے۔