مقبوضہ کشمیر میں بھارتی پولیس فورس کے افسر نے خودکشی کرلی

سری نگر (ڈیلی اردو) بھارتی کشمیر میں سینٹرل ریزرو پولیس فورس کے آفیسر نے خود کو سرکاری پستول سے گولی مار کر اپنی زندگی کا خاتمہ کرلیا۔

کشمیر میڈیا سروس کے مطابق مقبوضہ کشمیر کے علاقے بھدرواہ میں سی آر پی ایف کے سب انسپکٹر نے فوجی اڈے میں اپنی رائفل سے سر میں گولی مار کر خود کشی کرلی۔ ساتھی اہلکاروں نے شدید زخمی حالت میں ملٹری اسپتال پہنچایا جہاں دوران علاج آفیسر نے دم توڑ دیا۔

سرکاری پستول سے خودکشی کا یہ واقعہ 33 بٹالین ہیڈ کوارٹر بھدرواہ میں پیش آیا۔ تاحال خودکشی کی وجہ کا تعین نہیں کیا جا سکا ہے۔ آفیسر کی لاش کو ضروری کارروائی کے بعد لواحقین کے حوالے کردیا گیا ہے جب کہ واقعے کی تفتیش کے لیے ایک انکوائری کمیٹی تشکیل دیدی گئی ہے۔

واضح رہے کہ مقبوضہ کشمیر میں بھارتی فوج کے اہلکاروں کی پست ہمتی اور ذہنی دباؤ کے باعث خودکشی کے واقعات میں اضافہ ہوا ہے اور 2007 سے تاحال خودکشی یا آپسی جھگڑوں میں ہلاک ہونے والے اہکاروں کی تعدد 468 ہوگئی ہے۔