مکہ مشترکہ دفاعی معاہدہ، لیفٹیننٹ جنرل (ر) نعمان محمود پہلے سیکریٹری جنرل مقرر

اسلام آباد(ڈیلی اردو) حکومت پاکستان نے لیفٹیننٹ جنرل (ر) نعمان محمود، ہلالِ امتیاز (ملٹری)، کو مکہ مشترکہ دفاعی معاہدے کے تحت قائم ہونے والے اتحاد کا پہلا سیکریٹری جنرل مقرر کردیا ہے۔ وہ سعودی دارالحکومت ریاض میں قائم کیے جانے والے جنرل سیکریٹریٹ کی سربراہی کریں گے۔

یہ تقرری پاکستان، سعودی عرب اور ترکیہ کے درمیان دفاعی تعاون کے لیے قائم کیے گئے مکہ مشترکہ دفاعی فریم ورک کو عملی اور ادارہ جاتی شکل دینے کی جانب اہم پیش رفت ہے۔ معاہدے کے تحت تینوں ممالک نے جنرل سیکریٹریٹ قائم کرنے اور اس کی سربراہی ابتدائی طور پر پاکستان سے تعلق رکھنے والے سیکریٹری جنرل کو سونپنے کا فیصلہ کیا تھا۔

تینوں ممالک کے درمیان مکہ مشترکہ دفاعی معاہدہ 7 اگست 2026 کو مکہ مکرمہ میں طے پایا تھا۔ بعد ازاں 31 اگست کو استنبول میں ہونے والے پہلے اسٹریٹجک سیاسی و دفاعی کمیٹی اجلاس میں معاہدے کے تحت تعاون کو مزید منظم کرنے اور ریاض میں جنرل سیکریٹریٹ قائم کرنے پر پیش رفت ہوئی۔

فیصلے کے مطابق جنرل سیکریٹریٹ اتحاد کے ادارہ جاتی امور اور باہمی دفاعی تعاون کو آگے بڑھانے میں معاونت کرے گا، جبکہ پہلے سیکریٹری جنرل کا تعلق پاکستان سے ہوگا اور ان کی ابتدائی مدت تین سال مقرر کی گئی ہے۔

لیفٹیننٹ جنرل (ر) نعمان محمود پاک فوج کے سابق سینئر افسر ہیں۔ وہ ماضی میں پشاور میں قائم 11 کور کی کمانڈ کے علاوہ نیشنل ڈیفنس یونیورسٹی کے صدر بھی رہ چکے ہیں۔

مکہ مشترکہ دفاعی معاہدہ پاکستان، سعودی عرب اور ترکیہ کے درمیان دفاعی تعاون، اجتماعی دفاع اور علاقائی سلامتی سے متعلق مشترکہ فریم ورک فراہم کرتا ہے۔ معاہدے کے مطابق تینوں ممالک کے درمیان دفاعی تعاون کو مزید منظم کرنے کے لیے مشترکہ ادارہ جاتی ڈھانچہ تشکیل دیا جا رہا ہے۔