مہمند میں سیکورٹی فورسز کا آپریشن، کالعدم ٹی ٹی پی کے 6 عسکریت پسند ہلاک

مہمند (نمائندہ ڈیلی اردو)  پاکستان کے قبائلی ضلع مہمند کے سوران درہ اور شیخ بابا کے علاقوں میں سیکیورٹی فورسز نے کالعدم تحریک طالبان پاکستان (ٹی ٹی پی) کے خلاف انٹیلی جنس بیسڈ آپریشن کیا، جس کے دوران شدید فائرنگ کا تبادلہ ہوا۔

اطلاعات کے مطابق، فائرنگ کے تبادلے میں اب تک چھ عسکریت پسند ہلاک اور متعدد دیگر زخمی ہو گئے ہیں۔ ہلاک شدگان کالعدم ٹی ٹی پی کے مقامی کمانڈر اور سرگرم اراکین تھے۔

سیکیورٹی ذرائع کے مطابق، اس کارروائی میں ایک فوجی ہلاک جبکہ تین دیگر اہلکار زخمی ہوئے ہیں۔ زخمی اہلکاروں کو فوری طور پر قریبی اسپتال منتقل کر کے طبی امداد فراہم کی گئی۔

ذرائع نے بتایا کہ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

ہلاک شدگان ٹی ٹی پی کے حالیہ دہشت گردانہ حملوں میں ملوث تھے اور ان کے قبضے سے اسلحہ، گولہ بارود اور دیگر دھماکہ خیز مواد بھی برآمد ہوا۔ 

گزشتہ چند ماہ میں کئی کارروائیوں کے دوران سکیورٹی فورسز نے دہشتگردوں کے ٹھکانوں کو تباہ کیا اور متعدد دہشتگردوں کو ہلاک یا گرفتار کیا ہے۔