میر علی میں دہشتگردوں کا کواڈ کاپٹر حملہ، بچہ ہلاک، 7 زخمی

میر علی(ڈیلی اردو) خیبرپختونخواہ شمالی وزیرستان کی تحصیل میر علی میں سکیورٹی فورسز کے دہشتگردوں کے خلاف انٹیلی جنس بنیادوں پر جاری آپریشن کے دوران مبینہ طور پر دہشتگردوں نے شہری آبادی کو کواڈ کاپٹر کے ذریعے نشانہ بنا دیا، جس کے نتیجے میں ایک بچہ ہلاک جبکہ 7 افراد زخمی ہوگئے۔

ذرائع کے مطابق سکیورٹی فورسز علاقے میں دہشتگردوں کے خلاف کارروائی میں مصروف تھیں کہ دہشتگردوں نے کارروائی سے توجہ ہٹانے اور ممکنہ طور پر فرار ہونے کا راستہ بنانے کے لیے آبادی کی جانب دھماکا خیز مواد سے لیس کواڈ کاپٹر بھیجا۔ حملے کے نتیجے میں ابتدائی طور پر 8 بچے زخمی ہوئے۔

ذرائع کا کہنا ہے کہ زخمی بچوں میں سے ایک بعدازاں زخموں کی تاب نہ لاتے ہوئے ہلاک ہوگیا، جبکہ دو زخمی بچوں کی حالت تشویشناک بتائی جاتی ہے۔

واقعے کی اطلاع ملتے ہی سکیورٹی فورسز کے اہلکار موقع پر پہنچ گئے اور متاثرہ بچوں کو فوری طور پر طبی امداد کے لیے ڈسٹرکٹ ہیڈکوارٹر اسپتال منتقل کیا۔ بعدازاں شدید زخمی بچوں کو مزید علاج کے لیے سکیورٹی انتظامات میں بنوں منتقل کردیا گیا۔

ذرائع کے مطابق واقعے کے بعد علاقے میں سکیورٹی مزید سخت کردی گئی ہے جبکہ دہشتگردوں کی تلاش اور علاقے کو محفوظ بنانے کے لیے کارروائی بھی جاری رہی۔

سکیورٹی ذرائع کا کہنا ہے کہ دہشتگردوں کی جانب سے ریموٹ کنٹرول فضائی آلات کے استعمال سے شہری آبادی بالخصوص بچوں کے لیے خطرات میں اضافہ ہوا ہے۔ آبادی والے علاقوں میں اس نوعیت کے حملوں سے نہ صرف شہریوں کی جانیں خطرے میں پڑتی ہیں بلکہ دہشتگرد خوف و ہراس پھیلانے کے لیے بھی ایسی کارروائیاں کرتے ہیں۔

سکیورٹی فورسز کے مطابق دہشتگردی کے خلاف کارروائیوں کے دوران شہریوں کے تحفظ کو ترجیح دی جاتی ہے، جبکہ میر علی میں پیش آنے والے واقعے کے بعد زخمیوں کو فوری طبی امداد، منتقلی اور علاج کی سہولت فراہم کرنے کے لیے اقدامات کیے گئے۔