نئی دہلی: پاکستان اور بھارت کے درمیان ثالثی کیلئے تیار ہیں، سعودی وزیر خارجہ

نئی دہلی (ڈیلی اردو) سعودی وزیر خارجہ شہزادہ فیصل بن فرحان آل سعود کا کہنا ہے کہ سعودی عرب پاکستان اور بھارت کے درمیان ثالثی کیلئے تیار ہے۔

سعودی وزیر خارجہ ان دنوں بھارت کے دورے پر موجود ہیں جہاں انہوں نے بھارتی وزیر اعظم نریندر مودی سے بھی ملاقات کی۔

سعدت بزيارة جمهورية الهند والتشرف بنقل تحيات القيادة- حفظها الله- لدولة رئيس الوزراء. كما اجريت محادثات مثمرة مع وزير الخارجية تناولت المواضيع الثنائية و الاقليمية تؤكد على عمق العلاقات التاريخية بين البلدين والشعبين الصديقين. نحن عازمون على تعزيز شراكتنا الاستراتيجية. pic.twitter.com/qFyXpK1xuV

— فيصل بن فرحان (@FaisalbinFarhan) September 20, 2021

دورے کے دوران بھارتی ٹی وی کو دیے گئے انٹرویو میں فیصل بن فرحان آل سعود کا کہنا تھا کہ سعودی عرب، پاکستان اور بھارت کے درمیان ثالثی کیلئے تیار ہے، مذاکرات کیلئے درست وقت کا تعین پاکستان اور بھارت پر منحصر ہے۔

انھوں نے کہا کہ پاکستان بھارت کو مذاکرات کیلئے فورمز فراہم کریں گے، مسئلہ کشمیر کے حل کیلئے دونوں ملک مذاکرات کریں۔

گزشتہ روز اپنی گفتگو میں فیصل بن فرحان نے کہا تھا کہ افغانستان میں القاعدہ، داعش اور طالبان کا دوبارہ منظرعام پرآنا قابل فکر ہے۔

سعودی وزیر خارجہ کا کہنا تھاکہ افغانستان سے دوسرے ممالک میں دہشتگردی پھیلنے کے خطرات پر تحفظات ہیں لیکن طالبان نےکہا ہے کہ افغان سرزمین کسی دوسرے ملک میں دہشتگردی کیلئے استعمال نہیں ہوگی۔

ان کا کہنا تھا کہ طالبان حکومت کو تسلیم کرنے کیلئے انتظار کرو اور دیکھو کی پالیسی پر عمل کر رہے ہیں جبکہ افغانستان میں امن و استحکام اور شمولیتی پالیسی چاہتے ہیں۔