نو ماہ بعد کرم کا زمینی رابطہ بحال، مسافر گھروں کو لوٹنے لگے

کرم / پشاور (ڈیلی اردو + بی بی سی) خیبرپختونخوا کے قبائلی ضلع کرم کا ملک کے دیگر حصوں سے زمینی رابطہ نو ماہ کی بندش کے بعد بالآخر بحال ہوگیا۔ اکتوبر 2023 میں فرقہ وارانہ کشیدگی کے بعد بند کی گئی مرکزی شاہراہ اب سیکیورٹی پروٹوکول کے تحت جزوی طور پر کھول دی گئی ہے، جس سے پاراچنار کے مکینوں کو جزوی ریلیف ملا ہے۔

یاد رہے کہ گزشتہ برس اہل تشیع زائرین کی گاڑیوں پر حملے اور اس کے بعد جوابی کارروائیوں کے باعث خطے میں کشیدگی پھیل گئی تھی، جس کے بعد انتظامیہ نے مرکزی شاہراہ کو بند کر دیا تھا۔ اس بندش کے دوران نہ صرف اشیائے خوردونوش کی قلت پیدا ہوئی بلکہ سیکڑوں طلبہ اور شہری دیگر شہروں میں محصور ہو کر رہ گئے۔

پشاور میں تعلیمی سلسلے کے باعث مقیم حیدر علی جیسے متعدد نوجوان اس بندش سے شدید متاثر ہوئے۔ حیدر کا کہنا ہے کہ ’’یہ زندگی کے بدترین دن تھے، کبھی ہاسٹل، کبھی ہوٹل اور کبھی رشتہ داروں کے گھروں میں وقت گزارنا پڑا۔‘‘

زمینی راستے کی بندش کے باعث حکومت نے محدود پیمانے پر ہیلی سروس کا آغاز بھی کیا تھا، جو کہ ناکافی ثابت ہوئی۔ اب روڈ کھلنے کے بعد علی انور، جو پاراچنار اڈے پر منشی ہیں، کے مطابق روزانہ بیس سے بائیس مسافر گاڑیاں پاراچنار پہنچ رہی ہیں۔ روڈ فی الحال صبح 9 بجے سے سہ پہر 3 بجے تک کھولا جاتا ہے، جبکہ اشیائے خوردونوش سے لدی گاڑیاں بدستور مین ٹل-پاراچنار روڈ ہی استعمال کر رہی ہیں۔

ایڈیشنل ڈپٹی کمشنر کرم، عامر نواز کے مطابق، روڈ کو مرحلہ وار سیکیورٹی پروٹوکول کے تحت کھولا جا رہا ہے تاکہ کسی بھی ناخوشگوار واقعے سے بچا جا سکے۔ ان کا کہنا ہے کہ حکومت کی طرف سے متبادل راستوں پر کوئی پابندی نہیں، لیکن اہل تشیع آبادی متبادل روٹس کو ترجیح دے رہی ہے۔

اس وقت بیشتر مسافر گاڑیاں شورکو، ٹنگئی اور منڈاؤ جیسے علاقوں سے گزر کر علیزئی پہنچتی ہیں، جبکہ صدہ، پیر قیوم اور کھڑکئی کے راستے اب بھی غیر محفوظ سمجھے جا رہے ہیں۔ حکومت کا کہنا ہے کہ دسمبر 2024 میں ہونے والے امن معاہدے اور حالیہ جرگوں کے مثبت نتائج کی بنیاد پر حالات معمول پر آ رہے ہیں۔

علاقے میں امن کی مکمل بحالی کے لیے ضلعی انتظامیہ اور مقامی عمائدین کے درمیان رابطے جاری ہیں، اور توقع کی جا رہی ہے کہ جلد ہی روڈ کو 24 گھنٹے کے لیے کھولنے کا اعلان بھی کر دیا جائے گا۔