نوشہرہ میں پولیو ٹیم پر حملہ، پولیس اہلکار ہلاک

نوشہرہ (نمائندہ ڈیلی اردو)  خیبرپختونخوا کے ضلع نوشہرہ کے علاقے نظام پور میں پولیو ٹیم کی سیکیورٹی پر مامور پولیس اہلکار پر نامعلوم مسلح دشت گردوں نے فائرنگ کر دی۔ فائرنگ کے نتیجے میں ایک پولیس اہلکار موقع پر ہی ہلاک ہو گیا جبکہ حملہ آور فرار ہونے میں کامیاب ہو گئے۔

واقعے کے بعد پولیس کی بھاری نفری علاقے میں پہنچ گئی اور سرچ آپریشن شروع کر دیا گیا۔ ڈی پی او نوشہرہ کے مطابق ہلاک اہلکار کا تعلق امان گڑھ پولیس اسٹیشن سے تھا۔

وزیر صحت خیبرپختونخوا نے واقعے کی مذمت کرتے ہوئے کہا کہ ’’پولیو ٹیم پر حملہ دراصل معصوم بچوں کے مستقبل پر حملہ ہے۔‘‘

ملک بھر میں جاری قومی انسدادِ پولیو مہم کے دوران اب تک دو کروڑ سے زائد بچوں کو ویکسین کے قطرے پلائے جا چکے ہیں۔