نوشہرہ: نظام پور سے ہیڈ محرر سمیت 3 پولیس اہلکار لاپتہ، اغوا کا خدشہ

نوشہرہ (ڈیلی اردو) خیبرپختونخواہ کے شورش زدہ ضلع نوشہرہ کے حساس علاقے نظام پور میں تھانے کے ہیڈ محرر سمیت تین پولیس اہلکار اچانک لاپتہ ہوگئے، جنہیں مبینہ طور پر دہشتگرد اپنے ساتھ لے گئے۔ واقعے کے بعد پولیس نے اہلکاروں کی تلاش کے لیے مختلف علاقوں میں سرچ آپریشن شروع کردیا ہے، تاہم حکام نے تاحال اغوا کی باضابطہ تصدیق نہیں کی۔

پولیس ذرائع کے مطابق لاپتہ اہلکاروں میں تھانے کے محرر نعیم اللہ، کانسٹیبل عامر اور کانسٹیبل نور اسلام شامل ہیں۔ اطلاعات کے مطابق تینوں اہلکار سرکاری گاڑی میں موجود تھے کہ مبینہ طور پر دہشتگرد انہیں گاڑی سے اتار کر اپنے ساتھ لے گئے، جبکہ سرکاری گاڑی موقع پر ہی موجود پائی گئی۔

واقعے کی اطلاع ملنے پر پولیس کی بھاری نفری علاقے میں پہنچ گئی اور اہلکاروں کی بازیابی کے لیے مختلف مقامات پر تلاش اور کارروائیاں شروع کردیں۔ پولیس حکام کے مطابق واقعے کی تحقیقات جاری ہیں اور لاپتہ اہلکاروں کا سراغ لگانے کی کوششیں کی جارہی ہیں۔

نظام پور کا علاقہ نوشہرہ اور کوہاٹ کے قریب واقع ہونے کے باعث سکیورٹی کے حوالے سے حساس سمجھا جاتا ہے۔ ماضی میں بھی اس علاقے میں پولیس اور نامعلوم دہشتگردوں کے درمیان جھڑپوں کے واقعات پیش آچکے ہیں۔ تین پولیس اہلکاروں کے لاپتہ ہونے کے بعد علاقے میں تشویش پائی جاتی ہے، جبکہ واقعے کی مزید تفصیلات اور اہلکاروں کے بارے میں معلومات تاحال سامنے نہیں آئیں۔