واشنگٹن میں افغان پناہ گزین کی فائرنگ، نیشنل گارڈ کے دو اہلکار اور دیگر افراد زخمی

واشنگٹن ڈی سی (ش ح ط) امریکی دارالحکومت واشنگٹن میں وائٹ ہاؤس کے قریب فائرنگ کے ایک واقعے میں نیشنل گارڈ کے دو اہلکاروں سمیت متعدد افراد شدید زخمی ہوگئے جن کی حالت نازک بتائی جاتی ہے۔ حملہ کرنے والے افغان پناہ گزین کو موقع پر گرفتار کر لیا گیا۔

ایف بی آئی نے واقعے کو ابتدائی طور پر ممکنہ دہشت گرد حملے کے طور پر قرار دیا ہے، جبکہ قانون نافذ کرنے والے ادارے ابھی بھی ملزم کی تمام تفصیلات کی تصدیق کر رہے ہیں۔

حکام نے ڈیلی اردو کو بتایا کہ گرفتار ملزم رحمن اللہ لکنوال کا تعلق افغانستان سے ہے۔

وائٹ ہاؤس کی پریس سیکرٹری کیرولین لیوٹ نے کہا کہ وہ صورتِ حال پر مسلسل نظر رکھے ہوئے ہیں اور صدر ٹرمپ کو مکمل بریفنگ دے دی گئی ہے۔

مقامی میڈیا کے مطابق فائرنگ کے بعد وائٹ ہاؤس کو عارضی طور پر بند کر دیا گیا اور جائے وقوعہ کے اطراف کے علاقے کو گھیرے میں لے لیا گیا۔ پولیس نے شہریوں کو آئی اسٹریٹ کے قریب جانے سے گریز کرنے کی ہدایت کی۔

امریکی ہوم لینڈ سکیورٹی کی سیکرٹری نے کہا کہ قانون نافذ کرنے والے ادارے مشترکہ طور پر حقائق جمع کر رہے ہیں۔

صدر ڈونلڈ ٹرمپ نے واقعے پر ردعمل دیتے ہوئے حملہ آور کو “جانور” قرار دیا اور کہا کہ اسے اپنے کیے کی بھاری قیمت چکانی ہوگی۔

حکام کے مطابق حملہ آور اکیلا تھا اور زخمیوں کو اسپتال منتقل کر دیا گیا ہے۔ فائرنگ کے بعد وائٹ ہاؤس کو لاک ڈاؤن کر دیا گیا تھا، تاہم بعد میں رونالڈ ریگن ایئرپورٹ پر پروازیں معمول کے مطابق بحال کر دی گئیں۔

نائب صدر وینس نے کہا کہ فائرنگ کی وجہ تاحال معلوم نہیں ہو سکی۔ زخمی نیشنل گارڈ اہلکاروں کا تعلق ویسٹ ورجینیا سے ہے اور گورنر نے کہا کہ وفاقی حکام کے ساتھ تحقیقات جاری ہیں۔