وزیراعظم عمران خان اور امریکی صدر ٹرمپ کے درمیان ٹیلیفونک رابطہ، کشمیر کی صورتحال پر گفتگو

اسلام آباد (ڈیلی اردو) وزیراعظم عمران خان اور امریکی صدر کا ٹیلیفونک رابطہ ہوا ہے۔ سفارتی ذرائع کے مطابق وزیراعظٖم عمران خان نے امریکی صدر کو کشمیر کی موجودہ صورتحال سے آگاہ کیا۔

تفصیلات کے مطابق وزیراعظم عمران خان اور امریکی صدر ڈونلڈ ٹرمپ کا ٹیلیفونک رابطہ ہوا ہے۔ وزیراعظٖم عمران خان نے امریکی صدر کو کشمیر کی موجودہ صورتحال سے آگاہ کیا۔

وفاقی وزیر خارجہ شاہ محمود قریشی کے مطابق امریکی صدر ڈونلڈ ٹرمپ نے وزیراعظم عمران خان کو ٹیلی فون کیا، اس ٹیلیفونک رابطے میں وزیراعظم اور ڈونلڈ ٹرمپ کے درمیان تفصیلی گفتگو ہوئی، وزیراعظم نے مقبوضہ کشمیر کی خراب صورتحال، بھارتی مظالم اور اس کی عالمی قوانیں کی مسلسل خلاف ورزیوں سے آگاہ کیا۔

شاہ محمود قریشی کا کہنا ہے کہ وزیراعظم اور امریکی صدر کے مابین گفتگو میں علاقائی امن کو درپیش خطرات اور افغان امن عمل کے امور بھی زیر غور آئے جب کہ مسلسل رابطوں پر اتفاق بھی کیا گیا۔

وزیر خارجہ کا کہنا ہے کہ مقبوضہ کشمیر کی صورتحال پر سلامتی کونسل کا ہنگامی اجلاس آج ہورہا ہے اور اس سلسلے میں سلامتی کونسل کے 5 میں سے 4 ارکان سے رابطہ ہوچکا ہے جب کہ فرانسیسی صدر سے وزیراعظم عمران خان کی ٹیلیفونک رابطے کی کوشش کی جارہی ہے۔