وسطی کرم میں سیکیورٹی فورسز کی کارروائی، متعدد دہشتگرد ہلاک اور زخمی

کرم(ڈیلی اردو) وسطی کرم میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے دہشتگردوں کے مبینہ ٹھکانوں کو نشانہ بنایا، جس کے نتیجے میں متعدد دہشتگرد ہلاک اور زخمی ہوگئے۔

سیکیورٹی ذرائع کے مطابق علاقے میں دہشتگردوں کی موجودگی اور نقل و حرکت سے متعلق قابل اعتماد معلومات ملنے کے بعد کارروائی کی گئی۔ مبینہ طور پر ڈرون کے ذریعے دہشتگردوں کے ٹھکانوں کو نشانہ بنایا گیا، جس سے انہیں جانی نقصان اٹھانا پڑا۔

ذرائع کا کہنا ہے کہ کارروائی کے دوران دہشتگردوں کی مشتبہ پناہ گاہوں اور ان کی نقل و حرکت پر مسلسل نظر رکھی گئی۔ اہداف کی نشاندہی اور تصدیق کے بعد فضائی کارروائی کی گئی، جبکہ بعد ازاں سیکیورٹی اہلکاروں نے علاقے میں سرچ اور کلیئرنس کارروائی بھی کی۔

حکام کے مطابق وسطی کرم میں ہونے والی یہ کارروائی خیبرپختونخوا کے مختلف علاقوں میں دہشتگرد نیٹ ورکس کے خلاف جاری انٹیلی جنس بنیادوں پر آپریشنز کا حصہ ہے۔

سیکیورٹی ذرائع کا کہنا ہے کہ کارروائی کا مقصد دہشتگردوں کے محفوظ ٹھکانوں کو ختم کرنا اور ان کی دوبارہ منظم ہونے کی کوششوں کو ناکام بنانا ہے۔ تاہم ہلاک اور زخمی ہونے والے دہشتگردوں کی حتمی تعداد اور شناخت کے بارے میں مزید تفصیلات سامنے نہیں آسکیں۔

سیکیورٹی حکام نے کہا ہے کہ دہشتگردی کے خاتمے اور شہریوں کے تحفظ کے لیے انٹیلی جنس بنیادوں پر کارروائیاں جاری رکھی جائیں گی۔