ویسٹ انڈیز ویمن ٹیم 15 سال بعد پاکستان کا دورہ کرے گی

لاہور( سپورٹس رپورٹر ) ویسٹ انڈیز ویمن کرکٹ ٹیم 15 سال بعد رواں ماہ کے آخر میں پاکستان کا دورہ کرے گی۔

تفصیلات کے مطٓابق ویسٹ انڈیز اور پاکستان ویمن ٹیموں کے درمیان تین ٹی ٹوینٹی میچوں کی سیریز کا انعقاد 31 جنوری سے ہونے جا رہا ہے، تینوں ٹی ٹوینٹی میچز کراچی کے ساؤتھ اینڈ کلب میں کھیلے جائیں گے۔

پاکستان کرکٹ بورڈ کی جانب سے جاری اعلامیے کے مطابق مہمان ویسٹ انڈیز ویمن ٹیم ٹی ٹوینٹی سیریز کھیلنے کے لیے 15 سال بعد پاکستان آرہی ہے، دونوں ٹیموں کے درمیان ٹی ٹوینٹی میچز کی سیریز 31 جنوری، یکم فروری اور 3 فروری کو کراچی میں کھیلے جائیں گے۔

دونوں ٹیموں کے درمیان آئی سی سی ویمن چیمپئن شپ کے تین ایک روزہ میچز متحدہ عرب امارات میں کھیلے جائیں گے

پاکستان میں ٹی ٹوینٹی میچز کی سیریز کے بعد دونوں ٹیموں کے درمیان آئی سی سی ویمن چیمپئن شپ کے تین ایک روزہ میچز متحدہ عرب امارات میں کھیلے جائیں گے۔

ویسٹ انڈیز ویمن ٹیم کا دورہ پاکستان ملک میں انٹرنیشنل کرکٹ کی بحالی کی جانب ایک اور قدم ہے، اس سے قبل زمبابوے نے 2015 میں تین ون ڈے اور تین ٹی ٹوینٹی میچز پر مشتمل سیریز پاکستان میں کھیلی تھی۔

آخری مرتبہ ویسٹ انڈین ویمن ٹیم نے مارچ 2004 میں پاکستان کا دورہ کیا تھا جس کے دوران ٹیسٹ سیریز کسی نتیجے کے بغیر ختم ہوگئی تھی 7 میچز پر مشتمل ون ڈے سیریز ویسٹ انڈیز نے 5-2 سے اپنے نام کی تھی۔

واضح رہے کہ فاف ڈوپلیسی کی قیادت میں ورلڈ الیون کی ٹیم نے 2017 میں پاکستان کا دورہ کیا تھا اور تین ٹی ٹویںٹی میچز کھیلے جبکہ سری لنکا نے بھی اسی سال پاکستان میں ایک ٹی ٹوینٹی میچ کھیلا تھا۔