ٹانک : محسود مارکیٹ میں فائرنگ، 2 دہشتگرد ہلاک، امن کمیٹی کا ایک رکن بھی ہلاک

ٹانک(ڈیلی اردو) خیبرپختونخواہ کے شورش زدہ ضلع ٹانک میں محسود مارکیٹ میں دہشتگردوں کی موجودگی کی اطلاع پر کارروائی کے دوران فائرنگ کے تبادلے میں دو دہشتگرد ہلاک جبکہ امن کمیٹی کا ایک رکن بھی ہلاک اور دوسرا زخمی ہوگیا۔

پولیس کے مطابق مقامی امن کمیٹی کے ارکان کو علاقے میں تین دہشتگردوں کی موجودگی کی اطلاع ملی، جس پر انہوں نے مشتبہ مقام کی جانب پیش قدمی کی۔ اسی دوران تینوں دہشتگرد ایک دکان میں داخل ہونے کی کوشش کر رہے تھے کہ امن کمیٹی کے ارکان سے ان کا سامنا ہوگیا، جس کے بعد دونوں جانب سے فائرنگ کا تبادلہ شروع ہوگیا۔

پولیس کے مطابق فائرنگ کے نتیجے میں دو دہشتگرد ہلاک ہوگئے جبکہ تیسرا دہشتگرد موقع سے فرار ہونے میں کامیاب ہوگیا۔ فائرنگ کے دوران امن کمیٹی کا رکن عدنان بھی ہلاک جبکہ خبیب زخمی ہوگیا۔

واقعے کی اطلاع ملتے ہی سکیورٹی فورسز بھی موقع پر پہنچ گئیں اور علاقے کو گھیرے میں لے کر سرچ اور کلیئرنس کارروائی کی۔ پولیس کے مطابق کارروائی کے بعد علاقے کو کلیئر کردیا گیا۔

ہلاک ہونے والے دونوں دہشتگردوں کی لاشیں شناخت اور قانونی کارروائی کے لیے ڈسٹرکٹ ہیڈکوارٹر اسپتال ٹانک منتقل کردی گئی ہیں۔

سکیورٹی اداروں اور مقامی امن کمیٹیوں کی جانب سے ٹانک اور گردونواح میں دہشتگردوں کی موجودگی کی اطلاعات پر کارروائیاں جاری ہیں، جبکہ مقامی سطح پر سکیورٹی اداروں کے ساتھ تعاون کو بھی دہشتگردی کے خلاف اقدامات میں اہم قرار دیا جا رہا ہے۔