ٹانک میں سیکورٹی فورسز کا آپریشن، 8 پاکستانی طالبان ہلاک

راولپنڈی (نمائندہ ڈیلی اردو) پاکستانی فوج کا کہنا ہے کہ اس نے خیبر پختونخوا کے ضلع ٹانک میں ایک انٹیلیجنس بیسڈ آپریشن میں آٹھ پاکستانی طالبان کو ہلاک کیا ہے۔

جمعے کو ایک بیان میں فوج کے شعبہ تعلقات عامہ (آئی ایس پی آر) کا کہنا تھا کہ ہلاک ہونے والے شدت پسندوں کے قبضے سے اسلحہ اور گولیاں بھی برآمد ہوئی ہیں۔

بیان میں مزید کہا گیا ہے کہ ہلاک ہونے شدت پسند ’سکیورٹی فورسز، قانون نافذ کرنے والے اداروں اور عام شہریوں کے خلاف دہشتگردی کی متعدد کارروائیوں میں ملوث تھے۔‘

ڈیلی اردو کو حکام نے بتایا کہ اس آپریشن میں کالعدم تنظیم تحریک طالبان پاکستان (ٹی ٹی پی) کے اہم کمانڈر طورا سپہ اور سالار سمیت آٹھ شدت پسند مارے گئے۔

دریں اثنا، وزیراعظم محمد شہباز شریف نے ضلع ٹانک میں سیکیورٹی آپریشن میں 8 بھارتی حمایت یافتہ دہشت گردوں کو ہلاک کرنے پر سیکیورٹی فورسز کو خراج تحسین پیش کیا ہے۔

ان کا کہنا تھا کہ ملکی سالمیت کو نقصان پہنچانے کے خواشہمند عناصر کے مذموم عزائم کو خاک میں ملا دیں گے۔