ٹانک: ڈبلیو ایچ او کے آفیسر ڈاکٹر احسان سمیت تین اہلکار پاکستانی طالبان کے ہاتھوں اغوا

ٹانک (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع ٹانک میں پولیو مہم کی مانیٹرنگ کرنے والے ڈسٹرکٹ سرویلنس آفیسر ڈاکٹر احسان سمیت تین اہلکاروں کو پاکستانی طالبان نے یونین کونسل مولا زئی کے علاقہ عمر خیل سے اغوا کر لیا ہے۔

اغوا ہونے والوں میں ڈاکٹر احسان (ڈبلیو ایچ او ڈسٹرکٹ سرویلنس آفیسر)، حکمت اللہ (یوسی سی ایس او) اور عبداللہ (یوسی پی او) شامل ہیں۔ 

پولیس ذرائع کے مطابق تینوں اہلکار پولیو مہم کی نگرانی میں مصروف تھے جب طالبان دہشت گردوں نے انہیں اغوا کر لیا۔

دریں اثنا ٹانک پولیس نے خفیہ اطلاع پر کارروائی کرتے ہوئے تھانہ گومل کی حدود میں ایک پل کو دھماکے سے اڑانے کی کوشش ناکام بنا دی۔ بم ڈسپوزل یونٹ موقع پر پہنچ کر شرپسند عناصر کی جانب سے نصب کی گئی دیسی ساختہ آئی ای ڈی کو ناکارہ بنا دیا۔

پولیس نے مزید کہا کہ معاملے کی تحقیقات شروع کر دی گئی ہیں اور علاقے میں سیکیورٹی سخت کر دی گئی ہے۔ پولیس اور فورسز نے تمام واقعات کی تحقیقات شروع کر کے علاقے میں سرچ آپریشن شروع کر دیا ہے۔