ٹرمپ-زیلنسکی ملاقات: یوکرین اور روس کے درمیان امن مذاکرات میں”اہم پیش رفت“

واشنگٹن (ڈیلی اردو رپورٹ) امریکی صدر ڈونلڈ ٹرمپ نے کہا ہے کہ اتوار کی شام فلوریڈا کے مار-اے-لاگو میں یوکرینی صدر وولودیمیر زیلنسکی کے ساتھ ان کی بات چیت میں "کافی اہم پیش رفت" ہوئی ہے۔ صدر ٹرمپ کے مطابق یوکرین اور روس ڈونباس کی حیثیت پر متفق ہونے کے "قریب تر" ہو رہے ہیں۔

یوکرین کے صدر زیلنسکی نے بھی ملاقات کو "زبردست" قرار دیا اور کہا کہ امریکہ اور یوکرین نے سکیورٹی کی ضمانتوں پر "سو فیصد" اتفاق کیا، جبکہ ٹرمپ کے مطابق اس پر تقریباً 95 فیصد اتفاق ہوا ہے۔

زیلنسکی نے مزید کہا کہ امریکی اور یوکرین کی ٹیمیں اگلے ہفتے مزید بات چیت کے لیے ملاقات کریں گی تاکہ جنگ کے خاتمے کے لیے اقدامات حتمی شکل دی جا سکیں۔ انہوں نے کہا کہ بین الاقوامی فوجی دستوں کی تعیناتی سلامتی کی ضمانتوں کا لازمی حصہ ہوگی اور روس کے زیر قبضہ زاپوریژیا جوہری پلانٹ اور دیگر علاقائی کنٹرول کے مسائل ابھی باقی ہیں۔

ٹرمپ نے کہا کہ اگر مذاکرات کامیاب رہے تو امن کے حوالے سے نتائج چند ہفتوں میں واضح ہو سکتے ہیں، تاہم چند باقی مسائل حتمی معاہدے میں رکاوٹ بھی بن سکتے ہیں۔ انہوں نے یہ بھی کہا کہ وہ یوکرین کا دورہ کرنے اور پارلیمنٹ میں خطاب کرنے کے لیے تیار ہیں، تاکہ ہر ممکنہ انسانی جان بچائی جا سکے۔

یورپی کمیشن کی صدر ارزلا فان ڈیئر لائن نے ملاقات کو سراہا اور کہا کہ یورپ اس پیش رفت کو مستحکم کرنے کے لیے امریکہ اور یوکرین کے ساتھ کام جاری رکھے گا۔ برطانوی وزیر اعظم کیئر اسٹارمر نے بھی یوکرین کے لیے برطانیہ کی حمایت اور دیرپا امن کے عزم کا اعادہ کیا۔

روس نے یوکرین پر مبینہ ڈرون حملے کا الزام عائد کیا، جسے زیلنسکی نے "روایتی روسی جھوٹ" قرار دیتے ہوئے مسترد کر دیا۔ روس نے کہا کہ اس سے اپنی مذاکراتی پوزیشن کا جائزہ لے گا، تاہم امریکہ کے ساتھ مذاکراتی عمل سے باہر نکلنے کا ارادہ نہیں رکھتا۔

صدر زیلنسکی نے زور دیا کہ سلامتی کی ضمانتیں اور بین الاقوامی نگرانی کے اقدامات جنگ ختم کرنے کے لیے کلیدی حیثیت رکھتے ہیں، اور ان کا کہنا تھا کہ مذاکرات کے دوران 20 نکاتی منصوبہ تقریباً 90 فیصد تیار ہے۔