ٹرمپ کی عمان کو سخت وارننگ، ایران سے ہتھیار ڈالنے کا مطالبہ

واشنگٹن(ڈیلی اردو) امریکی صدر ڈونلڈ ٹرمپ نے ایران کے ساتھ جاری کشیدگی کے تناظر میں عمان کو خبردار کیا ہے کہ اگر مسقط نے آبنائے ہرمز سے متعلق امریکی کوششوں میں رکاوٹ ڈالنے کی کوشش کی تو اسے شدید امریکی بمباری کا سامنا کرنا پڑ سکتا ہے۔

امریکی صدر نے یہ بیان فوکس نیوز کے صحافی ٹری ینگسٹ کو دیے گئے ایک انٹرویو میں دیا۔ ان کا کہنا تھا کہ عمان اگر امریکی اقدامات کی راہ میں آیا تو امریکا سخت کارروائی کرسکتا ہے۔

عمان کو دی جانے والی یہ دھمکی اس لیے بھی اہم قرار دی جا رہی ہے کہ مسقط طویل عرصے سے امریکا اور ایران کے درمیان سفارتی رابطوں اور ثالثی میں کردار ادا کرتا رہا ہے۔

ٹرمپ نے ایران کو بھی جنگ کے خاتمے کے لیے ہتھیار ڈالنے اور سفید جھنڈا لہرانے کا مشورہ دیا۔ ان کے مطابق ایرانی قیادت مشکل صورتحال میں ہے، اگرچہ انہوں نے ایرانی رہنماؤں کو اچھا پوکر کھلاڑی بھی قرار دیا۔

جنگ بندی کے لیے طے کی گئی 60 روزہ مدت ختم ہونے کے حوالے سے امریکی صدر نے کہا کہ ایران کے معاملے پر کوئی مقررہ مدت مقرر نہیں کی گئی اور امریکا جلد بازی میں فیصلہ کرنے کا ارادہ نہیں رکھتا۔ ان کے بقول واشنگٹن کی بنیادی ترجیح ایران کو جوہری ہتھیار بنانے سے روکنا ہے۔

ٹرمپ نے ایران کے خلاف کارروائی میں امریکی ہتھیاروں کے بڑے پیمانے پر استعمال سے متعلق رپورٹس کو بھی مسترد کرتے ہوئے دعویٰ کیا کہ امریکا نے اپنے ہتھیاروں کے ذخیرے کا انتہائی معمولی حصہ استعمال کیا ہے۔