پانچ یورپی شہریوں کے امریکہ میں داخلے پر پابندی، یورپی یونین کی شدید مذمت

واشنگٹن/برسلز (ڈیلی اردو/نیوز ایجنسیاں) یورپی یونین نے امریکہ کے اس اقدام کی شدید الفاظ میں مذمت کی ہے، جس کے تحتیورپی یونین کے رکن ممالک کے پانچ شہریوں کے امریکہ کے سفر اور امریکہ میں داخلے پر پابندی لگا دی گئی ہے۔ ان پانچ یورپی شہریوں میں یونین کے سنگل مارکیٹ سے متعلقہ امور کے نگران سابق کمشنر تھیئری بریٹوں بھی شامل ہیں۔

برسلز میں یورپی یونین کے صدر دفاتر سے موصولہ رپورٹوں کے مطابق یورپی یونین کی کونسل کے صدر انٹونیو کوسٹا نے بدھ 24 دسمبر کے روز کہا کہ یورپی یونین کے لیے واشنگٹن کا یہ اقدام اس لیے ’’ناقابل قبول‘‘ ہے کہ ’’اتحادیوں، پارٹنرز اور دوستوں کے مابین ایسا بالکل نہیں کیا جاتا۔‘‘

کوسٹا نے ان سفری پابندیوں کی مذمت کرتے ہوئے سوشل میڈیا پلیٹ فارم ایکس پر اپنی ایک پوسٹ میں لکھا، ’’یورپی یونین آزادی اظہار رائے، منصفانہ اصولوں اور اپنی ریگولیٹری خود مختاری کے معاملے میں اپنے دفاع کے بنیادی اصول پر سختی سے قائم ہے۔‘‘

یورپی یونین کے شہریوں پر انہی امریکی سفری پابندیوں کے تناظر میں یورپی کمیشن کی صدر ارزولا فان ڈئر لاین نے کہا ہے، ’’آزادی اظہار رائے یورپی جمہوری معاشروں کی ترقی اور مضبوطی کی ایسی بنیاد ہے، جس سے کوئی انحراف نہیں کیا جا سکتا۔‘‘

فرانسیسی صدر ماکروں کی طرف سے بھی شدید تنقید

فرانسیسی صدر ایمانوئل ماکروں نے بھی پانچ یورپی شہریوں کے امریکہ میں داخلے پر عائد کردہ پابندی کی مذمت کرتے ہوئے کہا ہے کہ وہ یورپی یونین کے سابق کمشنر تھیئری بریٹوں، جس کا تعلق فرانس سے ہے، کی بھرپور اور غیر مشروط حمایت کرتے ہیں۔

ماکروں نے ایکس پر ایک پوسٹ میں لکھا، ’’میں نے اس پابندی کے بعد خاص طور پر سابق کمشنر بریٹوں سے بات کی ہے اور یورپ کے لیے ان کی خدمات پر ان کا شکریہ ادا کیا ہے۔‘‘

فرانسیسی صدر نے لکھا، ’’ہم ہار نہیں مانیں گے اور یورپ کی خود مختاری اور یورپی شہریوں کی آزادی کی ہمیشہ حفاظت کرتے رہیں گے۔‘‘

امریکی محکمہ خارجہ نے کل منگل کے روز اعلان کیا تھا کہ وہ تھیئری بریٹوں اور چار دیگر یورپی ایکٹیوسٹس کو اس لیے امریکہ میں داخلے کی اجازت نہیں دے گا کہ وہ امریکی سوشل میڈیا پلیٹ فارمز کی کارکردگی پر اثر انداز ہونے کی کوشش کرتے ہوئے یورپ میں ایسی آراء کو سینسر کرنا چاہتے ہیں، جن کے وہ خود مخالف ہیں۔