پاک بھارت سرحد پر کشیدگی: شہباز شریف نے سیز فائر کو پاکستان کی فتح قرار دیا

اسلام آباد (ڈیلی اردو) وزیر اعظم شہباز شریف نے انڈیا کے ساتھ سیز فائر کو پاکستان کی فتح قرار دے دیا ہے۔

سنیچر کی شب قوم سے خطاب کرتے ہوئے وزیر اعظم کا کہنا تھا کہ “دنیا پر واضح ہوگیا کہ پاکستانی ایک خوددار قوم ہیں۔ اگر کوئی ہماری خود مختاری کو چیلنج کرے تو ہم اپنی سرزمین کے دفاع کے لیے کھڑے ہو جاتے ہیں اور دشمن پر غالب آتے ہیں۔”

انھوں نے کہا کہ “دشمن نے جو کچھ کیا، وہ بزدلانہ اور شرمناک فعل تھا۔ یہ کھلی جارحیت تھی جس کا ہماری دلیر اور بہادر فوج نے پیشہ ورانہ انداز میں بھرپور جواب دیا۔”

شہباز شریف نے دعویٰ کیا کہ انڈیا نے “پہلگام واقعے کو بہانہ بنا کر ہم پر بلاجواز جنگ مسلط کی۔” انھوں نے مزید کہا کہ پاکستان نے “غیر جانبدار تحقیقات کی پیشکش کی اور انڈیا کے بے بنیاد الزامات پر برداشت کا مظاہرہ کیا۔”

تاہم انھوں نے الزام عائد کیا کہ انڈیا نے “ڈرون حملوں اور میزائلوں سے معصوم جانوں، شہری آبادی کو نشانہ بنا کر ہمارے صبر کا امتحان لیا۔ فوجی تنصیبات اور آبی تنصیبات کو نشانہ بنانے کی ناکام کوشش کی۔”

“ہم نے فیصلہ کیا کہ دشمن کو اسی زبان میں جواب دیا جائے جو وہ سمجھتا ہے اور فیصلہ کیا کہ جو ملاقات میز پر ہونی تھی، اب میدان جنگ میں ہوگی۔”

خیال رہے کہ انڈیا نے اپنے زیرِ انتظام کشمیر کے علاقے پہلگام میں سیاحوں پر حملے کے بعد پاکستان کو قصوروار ٹھہرایا تھا جس کی اسلام آباد نے تردید کی تھی۔

شہباز شریف نے اپنے خطاب کے اختتام پر کہا کہ “یہ پوری قوم کی فتح ہے، یہ عظیم لمحہ شکر ہے۔”