پاکستان اور افغانستان مذاکرات ڈیڈ لاک کا شکار، پاکستانی وفد استنبول سے واپس

استنبول + اسلام آباد (ڈیلی اردو/بی بی سی) پاکستان کے وزیرِ دفاع خواجہ آصف نے کہا ہے کہ پاکستان اور افغان طالبان کے درمیان جاری مذاکرات مکمل ڈیڈ لاک کا شکار ہو گئے ہیں اور اس حوالے سے آئندہ کسی دور کی کوئی امید نہیں ہے۔ ان کے مطابق پاکستانی مذاکراتی وفد استنبول سے وطن واپس آ رہا ہے۔

جیو نیوز کے پروگرام میں گفتگو کرتے ہوئے خواجہ آصف کا کہنا تھا کہ مذاکرات میں افغان وفد نے پاکستان کے کئی نکات کو زبانی طور پر تسلیم کیا، تاہم وہ انہیں تحریری معاہدے کی شکل دینے پر تیار نہیں تھے۔ ’’بین الاقوامی سفارتی اصول یہی ہے کہ معاملات تحریری شکل میں طے ہوتے ہیں، صرف زبانی یقین دہانیوں کا کوئی اعتبار نہیں۔‘‘

وزیر دفاع نے کہا کہ مذاکرات میں شامل ثالث بھی اب پیچھے ہٹ گئے ہیں، کیونکہ اگر کسی بریک تھرو کی امید ہوتی تو پاکستانی وفد خالی ہاتھ واپس نہ آتا۔

ان کا کہنا تھا کہ پاکستان اور افغانستان کے درمیان فائر بندی صرف اسی حد تک ہے کہ سرحد پار سے پاکستان میں کوئی حملہ نہ ہو۔ ’’اگر افغانستان کی سرزمین سے دوبارہ دہشت گردی ہوئی تو جواب مؤثر اور واضح ہوگا۔‘‘

خواجہ آصف نے کہا کہ اگر افغان طالبان کہتے ہیں کہ کالعدم ٹی ٹی پی ان کے کنٹرول میں نہیں تو پھر پاکستان کو انہیں نشانہ بنانے کی اجازت ملنی چاہیے۔ ’’اگر ہم ان کے خلاف کارروائی کریں تو پھر افغانستان کو اعتراض نہیں ہونا چاہیے۔‘‘

پاکستان کی جانب سے دوسرا سرکاری مؤقف

وفاقی وزیر اطلاعات عطا اللہ تارڑ نے اپنے بیان میں کہا کہ افغان طالبان دوحہ معاہدے کے تحت کیے گئے وعدے پورے کرنے میں ناکام رہے ہیں۔ ان کے مطابق یہ افغانستان کی ذمہ داری ہے کہ اس کی سرزمین پاکستان کے خلاف استعمال نہ ہو۔

ان کا کہنا تھا کہ پاکستان طالبان حکومت کے ایسے اقدامات کی حمایت نہیں کرے گا جو پڑوسی ممالک کے لیے نقصان دہ ہوں۔ ’’پاکستان اپنی خودمختاری اور عوام کے تحفظ کے لیے تمام ضروری اقدامات جاری رکھے گا۔‘‘