پاکستان اور افغانستان کشیدگی ختم کریں، یورپی یونین

برسلز (ڈیلی اردو) یورپی یونین نے پاکستان اور افغانستان کے درمیان بڑھتی ہوئی کشیدگی کے بعد فوری طور پر تنازع کم کرنے کا مطالبہ کیا ہے۔

یورپی یونین کی خارجہ پالیسی کی سربراہ کایا کالاس نے کہا:“ہم تمام فریقوں سے مطالبہ کرتے ہیں کہ فوری طور پر کشیدگی کم کریں اور سرحد پار حملوں کو روکیں کیونکہ اس کے خطے پر سنگین اثرات مرتب ہو سکتے ہیں۔”

انہوں نے مزید کہا کہ یورپی یونین دوبارہ واضح کرتی ہے کہ افغان سرزمین کو کسی دوسرے ملک کو دھمکانے یا اس پر حملہ کرنے کے لیے استعمال نہیں ہونا چاہیے۔

کایا کالاس نے افغان ڈی فیکٹو حکام سے بھی مطالبہ کیا کہ وہ افغانستان میں یا افغانستان سے سرگرم تمام دہشت گرد گروہوں کے خلاف مؤثر اقدامات کریں۔