پاکستان: جولائی میں دہشت گردی کے حملوں میں اضافہ، 215 افراد ہلاک، 199 زخمی

اسلام آباد (ڈیلی اردو رپورٹ) پاکستان انسٹیٹیوٹ فار کانفلکٹ اینڈ سیکیورٹی اسٹڈیز (پی سی ایس ایس) کی تازہ رپورٹ کے مطابق جولائی 2025 کے دوران ملک بھر میں دہشت گردی کے 82 واقعات رپورٹ ہوئے، جن میں مجموعی طور پر 215 افراد ہلاک اور 199 زخمی ہوئے۔ یہ تعداد جون کے مقابلے میں معمولی اضافہ ظاہر کرتی ہے، جب ملک بھر میں 78 حملے رپورٹ ہوئے تھے۔

رپورٹ کے مطابق جولائی میں دہشت گرد حملوں کے نتیجے میں 47 شہری اور 36 سیکیورٹی اہلکار ہلاک ہوئے، جبکہ جوابی کارروائیوں میں 18 شدت پسند مارے گئے۔ زخمیوں میں 90 شہری، 52 سیکیورٹی اہلکار، 7 شدت پسند اور ایک امن کمیٹی کا رکن شامل تھا۔

پی سی ایس ایس کے مطابق سیکیورٹی فورسز نے کارروائیوں میں 106 شدت پسندوں کو ہلاک کیا جبکہ 69 مشتبہ افراد کو گرفتار کیا گیا۔ ان آپریشنز کے دوران 7

 شہری بھی ہلاک ہوئے۔

رپورٹ میں بتایا گیا ہے کہ سیکیورٹی آپریشنز کے دوران صرف ایک اہلکار ہلاک ہوا، جو کہ رواں سال کی کم ترین ماہانہ تعداد ہے۔ تاہم دہشت گرد حملوں میں 36 سیکیورٹی اہلکار ہلاک ہوئے۔

مجموعی طور پر جولائی کے دوران دہشت گرد حملوں اور سیکیورٹی کارروائیوں کے نتیجے میں 124 شدت پسند، 54 شہری اور 37 سیکیورٹی اہلکار ہلاک ہوئے۔ زخمیوں کی تعداد 199 رہی، جن میں 107 شہری، 56 سیکیورٹی اہلکار، 35 شدت پسند اور ایک امن کمیٹی کا رکن شامل ہے۔

رپورٹ میں یہ بھی بتایا گیا ہے کہ دہشت گردوں نے جولائی کے دوران کم از کم 14 افراد کو اغوا کیا، جن میں سے بیشتر کا تعلق خیبر پختونخوا اور قبائلی اضلاع سے بتایا گیا ہے۔

پی سی ایس ایس کے تقابلی تجزیے کے مطابق جون کے مقابلے میں دہشت گرد حملوں میں 5 فیصد اضافہ، سیکیورٹی اہلکاروں کی ہلاکتوں میں 32 فیصد کمی، جبکہ سویلین ہلاکتوں میں 21 فیصد اضافہ ہوا۔ دہشت گردوں کی ہلاکتوں میں 49 فیصد اضافہ ریکارڈ کیا گیا۔

علاقائی لحاظ سے خیبر پختونخوا بشمول قبائلی اضلاع بدستور دہشت گردی سے سب سے زیادہ متاثر رہے، جہاں 53 حملے رپورٹ ہوئے۔ بلوچستان میں 28 حملے ہوئے، جبکہ پنجاب، سندھ، آزاد کشمیر اور اسلام آباد سے کسی حملے کی اطلاع نہیں ملی۔ گلگت بلتستان کے ضلع دیامر میں ایک حملہ رپورٹ ہوا۔

رپورٹ میں یاد دہانی کرائی گئی ہے کہ نومبر 2022 میں کالعدم تحریک طالبان پاکستان (ٹی ٹی پی) کی جانب سے حکومت کے ساتھ سیزفائر ختم کرنے کے بعد ملک میں دہشت گردی کے واقعات میں مسلسل اضافہ دیکھنے میں آیا ہے، جو اب بھی جاری ہے۔