پاکستان نے افغان مہاجرین کی واپسی کیلئے طورخم سرحد دوبارہ کھول دی

پشاور (ڈیلی اردو ) پاکستان نے آج ہفتہ یکم نومبر کو افغانستان کے ساتھ ایک اہم سرحدی گزرگاہ افغان مہاجرین کی وطن واپسی کے لیے کھول دی ہے۔ 

ان دونوں ہمسایہ ممالک کے درمیان ہلاکت خیز سرحدی جھڑپوں کے بعد سرحدی گزرگاہیں 11 اکتوبر کو بند کر دی گئی تھیں۔ 

ایک پاکستانی سرکاری اہلکار نے جرمن خبر رساں ادارے ڈی پی اے کو بتایا کہ طورخم سرحدی گزرگاہ کو مہاجرین کی وطن واپسی کے لیے دوبارہ کھول دیا گیا ہے، لیکن سرحد کے ذریعے تجارتی سرگرمیاں معطل رہیں گی۔

ہزاروں افغان مہاجرین طورخم کے قریب عارضی کیمپوں میں کارروائی مکمل ہونے کے انتظار میں اور ملک کے دیگر حصوں میں حراستی مراکز میں پھنسے ہوئے تھے۔

گزشتہ ماہ پاکستان اور افغانستان کے درمیان گزشتہ کئی دہائیوں کی بدترین سرحدی جھڑپیں ہوئی تھیں۔ اسلام آباد کابل کی طالبان حکومت پر الزام عائد کرتا ہے کہ اس نے پاکستانی طالبان کو پناہ دے رکھی ہے جو سرحد پار کر کے پاکستانی سکیورٹی فورسز کو نشانہ بناتے ہیں، تاہم افغانستان ان الزامات کی تردید کرتا ہے۔

ان جھڑپوں کے بعد، جن میں دونوں اطراف درجنوں افراد ہلاک ہوئے، دونوں پڑوسیوں نے جنگ بندی پر اتفاق کیا، تاہم ایک مستقل جنگ بندی کے لیے مذاکرات کا سلسلہ تاحال جاری ہے اور ترکی اور قطر کی ثالثی میں ہونے والے مذاکرات کے بعد جمعرات کو دونوں فریقوں نے جنگ بندی کو ایک ہفتے کے لیے مزید بڑھانے پر اتفاق کیا۔

پاکستان کی حکومت افغان مہاجرین اور تارکین وطن کو ان کے ملک واپس بھیجنے کی مہم پر عمل پیرا ہے، اور اس نے ملک کے مختلف حصوں میں دسیوں ہزار افراد کو پناہ دینے والے 50 سے زائد مہاجر کیمپ بند کرنے کا حکم دیا ہے۔

پاکستان نے مبینہ طور پرافغانستان کی سرزمین سے عسکریت پسند حملوں میں اضافے کا حوالہ دیتے ہوئے افغان مہاجرین کو نکالنے کی ایک بڑی مہم شروع کی، اور 2023 سے اب تک 1.47  ملین سے زیادہ افغانوں کو ان کے وطن واپس بھیج دیا ہے۔