پاکستان نے نئے طویل فاصلے تک مار کرنے والے کروز میزائل کا کامیاب تجربہ کیا

راولپنڈی (ڈیلی اردو)  پاکستانی فوج کی طرف سے منگل 30 ستمبر کے روز بتایا گیا کہ اس نے طویل فاصلے تک زمین سے زمین تک مار کر سکنے والے ایک کروز میزائل کا نیا تجربہ کیا ہے، جس کی تیاری کا مقصد ملک کے روایتی میزائل دفاعی نظام کو مضبوط بنانا ہے۔

پاکستانی فوج کی طرف سے جاری کردہ ایک بیان میں کہا گیا کہ یہ میزائل ’فتح چار‘ طرز  کا ہے، جو زمین سے زمین تک 750 کلومیٹر کے فاصلے تک اپنے ہدف کو کامیابی سے نشانہ بنا سکتا ہے۔ بیان میں یہ نہیں بتایا گیا کہ فتح چار کا یہ ٹیسٹ فائر کہاں کیا گیا۔

پاکستان آرمی کے جاری کردہ بیان میں مزید کہا گیا کہ اس میزائل کی خاص بات اس پر نصب انتہائی جدید طرز کے ایوییانک اور نیوی گیشن نظام ہیں۔

پاکستانی فوج نے مزید بتایا کہ یہ کروز میزائل دشمن کے فضائی دفاعی نظام کو کامیابی سے چکمہ دینے کی صلاحیت بھی رکھتا ہے، جس کی مدد سے ’’پاکستان کی روایتی میزائلوں کے شعبے میں ہلاکت ‌خیز صلاحیت‘‘ کو مزید بہتر بنایا جا سکے گا۔

پاکستانی مسلح افواج کی طرف سے ملک میں ہی تیار کردہ کروز میزائلوں اور دیگر بڑے ہتھیاروں کے بار بار تجربات اس لیے بھی کیے جاتے ہیں کہ دیرینہ حریف ہمسایہ ملک بھارت کو، جس کے ساتھ وہ کئی جنگیں لڑ چکا ہے، یہ دکھایا جا سکے کہ پاکستانی افواج کسی بھی جنگی خطرے یا حملے کا کامیابی سے مقابلہ کرنے کی اہلیت رکھتی ہیں