پاکستان کا مقامی طور پر تیار کردہ فتح 4 ایکسٹینڈڈ کروز میزائل کا کامیاب تجربہ

اسلام آباد(ڈیلی اردو) پاکستان نے مقامی سطح پر تیار کیے گئے فتح 4 ایکسٹینڈڈ ورژن گراؤنڈ لانچڈ کروز میزائل کا کامیاب تجربہ کرلیا۔ پاک فوج کے شعبہ تعلقات عامہ (آئی ایس پی آر) کے مطابق جدید میزائل طویل فاصلے تک اہداف کو انتہائی درستگی سے نشانہ بنانے کی صلاحیت رکھتا ہے۔

آئی ایس پی آر کے مطابق فتح 4 ایکسٹینڈڈ ورژن جدید ایویانکس اور جدید نیوی گیشنل نظام سے لیس ہے، جبکہ تجربے کے دوران میزائل کے مختلف ذیلی نظاموں کے تکنیکی اور عملی پیمانوں کی بھی کامیاب توثیق کی گئی۔

ترجمان پاک فوج کے مطابق نئے ذیلی نظام میزائل کی نشانہ لگانے کی درستگی اور بقا کی صلاحیت کو مزید بہتر بنانے کے لیے شامل کیے گئے ہیں۔ تجربے کا مشاہدہ پاک فوج کے سینئر افسران کے علاوہ میزائل کی تیاری میں شامل سائنسدانوں اور انجینئرز نے کیا۔

فتح 4 کے کامیاب تجربے پر صدر مملکت آصف علی زرداری، وزیراعظم شہباز شریف، چیف آف ڈیفنس فورسز و فیلڈ مارشل عاصم منیر اور تینوں مسلح افواج کے سربراہان نے سائنسدانوں اور انجینئرز کو مبارک باد دی۔

اعلیٰ عسکری قیادت نے میزائل کی تیاری اور کامیاب تجربے میں کردار ادا کرنے والے سائنسدانوں اور انجینئرز کی تکنیکی صلاحیتوں، محنت اور عزم کو سراہا۔