پاکستانی فضائی حدود میں 8 ڈرونز کی مبینہ دراندازی، سکیورٹی فورسز نے مار گرائے

پشاور(ڈیلی اردو) پاکستانی سکیورٹی ذرائع کے مطابق پاکستان کی فضائی حدود میں داخل ہونے والے 8 مبینہ ڈرونز کو سکیورٹی فورسز کے فضائی دفاعی نظام نے کارروائی کرتے ہوئے مار گرایا۔

ذرائع کے مطابق یہ ڈرونز آج صبح مختلف مقامات سے پاکستانی حدود میں داخل ہوئے تھے۔ ان میں سے 4 ڈرونز طورخم بارڈر سے ملحقہ علاقوں جبکہ دیگر 4 ڈرونز کوہاٹ سے متصل سرحدی پہاڑی علاقوں میں گرائے گئے۔

سکیورٹی ذرائع کا کہنا ہے کہ فضائی دفاعی نظام نے ڈرونز کی موجودگی کا بروقت سراغ لگایا، جس کے بعد انہیں نشانہ بنایا گیا۔ کارروائی کے بعد گرائے گئے ڈرونز کا ملبہ تحویل میں لے کر اس کی جانچ کا عمل شروع کردیا گیا ہے۔

ذرائع کے مطابق پاک افغان سرحد پر فضائی نگرانی اور دفاعی نظام مسلسل فعال ہے، جبکہ کسی بھی ممکنہ فضائی دراندازی سے نمٹنے کے لیے متعلقہ ادارے الرٹ ہیں۔

سکیورٹی ذرائع نے دعویٰ کیا کہ ڈرونز کی پاکستانی حدود میں آمد کا واقعہ پاک افغان سرحد پر جاری کشیدگی کے تناظر میں پیش آیا۔ ذرائع کے مطابق حالیہ دنوں میں سرحدی علاقوں میں فائرنگ اور دیگر واقعات کے بعد سکیورٹی اقدامات مزید سخت کیے گئے ہیں۔

ذرائع کا کہنا ہے کہ سکیورٹی فورسز سرحدی علاقوں میں کسی بھی قسم کی دراندازی کا مقابلہ کرنے اور شہریوں و اہم تنصیبات کے تحفظ کے لیے اقدامات جاری رکھے ہوئے ہیں۔

واضح رہے کہ گزشتہ شب کرم سیکٹر میں بھی فائرنگ کے واقعات رپورٹ ہوئے تھے، جن کے حوالے سے سکیورٹی ذرائع نے دعویٰ کیا تھا کہ پاکستانی فورسز نے جوابی کارروائی میں سرحد پار متعدد مورچوں اور ٹھکانوں کو نشانہ بنایا۔ ان واقعات کے بعد سرحدی علاقوں میں سکیورٹی مزید بڑھا دی گئی ہے۔