پاکپتن : دہشتگردی کی مبینہ کوشش ناکام، ٹی ٹی پی سے وابستہ شخص گرفتار

ساہیوال(ڈیلی اردو) صوبہ پنجاب کے ضلع ساہیوال میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے پاکپتن میں مبینہ دہشتگردی کی منصوبہ بندی ناکام بنادی اور ایک مشتبہ دہشتگرد کو گرفتار کرنے کا دعویٰ کیا ہے۔

سی ٹی ڈی حکام کے مطابق کارروائی 19 ایس پی چوک میں کی گئی، جہاں ایک شخص کو بڑی مقدار میں مبینہ طور پر دھماکا خیز مواد کے ساتھ گرفتار کیا گیا۔ حکام نے گرفتار شخص کی شناخت عبدالرحیم کے نام سے بتائی ہے، جو پشاور کے یونیورسٹی روڈ کا رہائشی ہے اور مبینہ طور پر کالعدم ٹی ٹی پی سے وابستہ ہے۔

حکام کے مطابق گرفتار شخص کے قبضے سے 2 کلوگرام سے زائد دھماکا خیز مواد، 3 آئی ای ڈی بیٹریاں، پرائما کارڈز اور فیوز سرکٹ برآمد ہوئے۔ بم ڈسپوزل اسکواڈ نے برآمد شدہ مواد کو موقع پر ہی ناکارہ بنا دیا۔

سی ٹی ڈی کا کہنا ہے کہ ابتدائی تفتیش کے مطابق مشتبہ شخص کا مقصد شہر میں دہشتگردی کی کارروائیاں کرکے خوف و ہراس پھیلانا تھا۔ گرفتار شخص کے خلاف سی ٹی ڈی تھانے میں انسداد دہشتگردی ایکٹ کے تحت مقدمہ درج کرلیا گیا ہے جبکہ مزید تفتیش جاری ہے۔