پشاور : ترناب فارم پولیس چوکی کے قریب دھماکا، 2 اہلکاروں سمیت 7 افراد زخمی

پشاور(ڈیلی اردو) خیبرپختونخواہ کے شورش زدہ دارلحکومت تھانہ چمکنی کی ترناب فارم پولیس چوکی کے قریب مبینہ طور پر دہشتگردوں کی جانب سے بارودی مواد پھینکے جانے کے نتیجے میں دھماکا ہوا، جس میں دو پولیس اہلکاروں سمیت 7 افراد زخمی ہوگئے۔

ابتدائی اطلاعات کے مطابق نامعلوم دہشتگردوں نے پولیس چوکی کے قریب بارودی مواد پھینکا، جس کے پھٹنے سے زور دار دھماکا ہوا۔ دھماکے کے بعد پولیس اور امدادی اداروں نے فوری طور پر علاقے کو گھیرے میں لے کر کارروائی شروع کردی۔

ریسکیو 1122 پشاور کے مطابق اطلاع ملتے ہی امدادی ٹیمیں اور ایمبولینسز جائے وقوعہ پر پہنچیں۔ زخمیوں کو موقع پر ابتدائی طبی امداد فراہم کرنے کے بعد مزید علاج کے لیے اسپتال منتقل کردیا گیا۔

ریسکیو حکام کے مطابق پانچ ایمبولینسز اور دو فائر وہیکلز موقع پر موجود رہیں، جبکہ ڈسٹرکٹ ایمرجنسی آفیسر افتخار خان نے جائے وقوعہ پر پہنچ کر امدادی کارروائیوں کی نگرانی کی۔

پولیس اور متعلقہ اداروں کی جانب سے دھماکے کی نوعیت، بارودی مواد اور واقعے میں ملوث عناصر کے حوالے سے تحقیقات جاری ہیں۔